Apo ni Soc nakuryente sa poste

Usa ka tres-anyos nga batang lalaki kinsa giangkong apo ni Mayor Socrates Fernandez nakuryentihan sa milabay'ng semana dihang aksidente niining nahikap ang poste sa kuryente diha sa gawas sa Talisay City Jail sa Maghaway.

Ang maong poste gikatahong "grounded" kini dihang nahikapan sa biktima nga si Yosefmar Fernandez, taga Sityo Mansueto, Bulacao kinsa uban sa inahan niini nga miduaw sa iyang amahan nga napriso diha sa maong prisohan.

Gibutyag sa mayor nga mikurog ang lawas sa bata dihang nakuryentihan kini apan swerte kaayo si Yosefmar tungod kay ginagmay lang paso sa kamot ang naangkon niini.

Si Jail Officer 3 Roger Daligdig, officer in charge sa City Jail, mipadangat og hangyo ni Fernandez nga ipasusi ang nahisgutang poste sa mga electrician aron malikayan nga adunay laing insidenteng mahitabo.