Budget sa CAIB pakubsan ni Tom

Mas gitinguha pa sa City Anti-Indencency Board (CAIB) nga doblehon ang ilang paningkamot paggukod sa mga law-ay'ng basahon ug pasundayag nga padayong misiaw karon dinhi sa dakbayan sa Sugbo.

Tungod niini, mohangyo ang chairman sa CAIB Dr. Rene Josef Bullecer ngadto kang Mayor Tomas Osmeña nga patas-an ang P138 mil nilang budget ngadto na sa P400 mil alang sa tibuok tuig nilang operasyon sunod tuig.

Kini aron makalihok ang CAIB pagpakigdugtong ngadto sa mga silinganang dakbayan sa Lapu-Lapu ug Talisay aron bungkagon ang padayong pagpalusot sa mga law-ay'ng basahon ug ang mga hubohubo nga pasundayag sa mga KTV bar ug uban pang matang sa balay kahilayan.

Apan sukwahi ang baruganan ni Mayor Tomas Osmeña tungod kay inay pun-an, plano niining kunhoran ang budget nga ihatag sa syudad sa CAIB sunod tuig.

Atol sa press conference kagahapon giklaro sa mayor nga wala gyud siya matagbaw sa performance sa CAIB tungod kay sukad ma sukad wala gyud siya hatagi og kopya sa mga nahimo niini may labot sa kampanya batok sa mga law-ay'ng pasundayag.

Alang sa mayor zero ang performance sa CAIB karong tuiga kun ang kampanya batok sa mga law-ay'ng basahon ug pasundayag ang hisgutan.

Gani, gipangutana pa sa mayor ang CAIB kun unsa ang partisipasyon niining nahimo sa mga gilusad nga pagpangronda sa kapolisan batok sa mga babayeng mugbo og lupad dinhi sa dakbayan.

Giklaro ni Osmeña nga estrikto siya ilabi na kun pagpangayo og pundo na ang hisgutan tungod kay gusto niya nga magbunga og positibong resulta ang matag gahin nga iyang ipagawas gumikan kay siya maoy manubag niini sa mga Sugboanon.