Suborno aron di dad-on sa Muntinlupa?

Duha ka mga piniriso sa Bagong Buhay Rehabilitation Center (BBRC) nga dugay na untang ibalhin sa New Bilibid Prison sa Muntinlupa nagpabilin gihapon sa maong bilanggoan human gipasanginlang misuborno og P40 mil ngadto sa warden sa BBRC.

Si Mayor Tomas Osmeña maoy mipublikar sa nadawat niining inpormasyon nga gipaagi sa text message kabahin sa piniriso nga sila si Carlos Dy, 26 ug Allan Mosqueda, 41, pulos molupyo sa Labangon nga giingong misuborno sa warden aron dili mabalhin sa Muntinlupa.

Sa pagpakighinabi sa Banat News ngadto kang SJO1 Lovely Lim sa record section sa BBRC, nasuta nga si Dy nakonbikto sa kasong murder ug nasilotan og pagkabilanggo sa tibuok kinabuhi apan giusab ang desisyon ug gipaminusan og 14 ka tuig ang sentensya human masayri nga minor de edad pa kini dihang nahitabo ang krimen ug pending pa ang laing kaso niini may labot sa gidiling drugas.

Samtang si Mosqueda nabalhog niadtong Pebrero 20, 2003 tungod sa kaso gihapon sa gidiling drugas ug pending pa ang kaso niini.

Base sa impormasyon nga nadawat sa mayor, duha ka tuig na untang ibalhin sa Muntinlupa sila si Dy ug Mosqueda apan napugngan kini tungod sa ilang pagsuborno sa warden.

Wala hinuon ibutang diha sa maong impormasyon kun si kinsa nga warden ang nakadawat sa maong suborno apan sa bahin ni mayor Osmeña, mituo siya sa ka balido sa maong taho tungod kay alang niya normal ang maong anomaliya diha sa maong bilanggoan.

"I believe this, to me this is normal for BBRC," dugang asoy ni Osmeña.

Samtang si jail warden Nemenio mibutyag sa Banat News nga sukad sa iyang paglingkod niadtong Pebrero karong tuiga nakadungog na siya anang maong alegasyon apan dihang iyang gipasusi, negatibo kini ug mugna lang sa panagkontra-kontra sa ubang mga piniriso.

Giklaro sab ni Nemenio, nga sukad sa iyang pag-asumer kapin na sa usa ka gatus ka mga piniriso ang napadala sa Muntinlupa ug ang nahabiling 180 ka piniriso ipadala gihapon kini sa Muntinlupa kun ma-release na ang P500 mil nga gahin nga ilang gipangayo sa syudad alang sa pletihan.

Matud ni Nemenio kadtong mga 'high-risk' nga piniriso ug tag-as ang sentensya maoy ilang giuna sa pagpadala didto sa Muntinlupa tungod kay nag-agad lang sila sa ayuda gikan sa dakbayan alang sa gastuhan niini.