Naglakaw gipusil

Hamtong lalaki nga gipusil sa wala mailhing lalaki samtang laglakaw paingon sa iyang iyaan niadtong Sabado sa gabii sa Sitio Palanas, Jolomaynon, usa ka bukirang bahin ug gibana-banang 12 ka kilometros ang gilay-on gikan sa Poblacion sa Dalaguete.

Ang biktima mao si Reynaldo Medel, ulitawo, lumad nga taga Alcoy, giingon nga usa ka aktibo sa fraternity sa ilang lungsod.

Apan ang kapolisan sa Dalaguete dili pa mokompirmar kun asa malambigit nga fraternity si Medel.

Samdan ang biktima sa dili mominos duha ka pinusilan sa wala nga bahin sa iyang tiyan ug tuong kamot agi sa wala pa matinong kalibre sa armas.

Nagtuo ang kapolisan nga panagbangi sa fraternity ang nagpaluyong motibo sa pagpamusil sa suspek.

Base sa pasiunang imbestigasyon sa kapolisan sa Dalaguete ug base sa asoy sa mga testigos, si Medel, nianang pasado alas 11:30 sa gabii, naglakaw sa dalan paingon sa balay sa iyang iyaan aron sa pagbisita.

Apan sa dihang duol na lang unta sa panimalay kalit lang mibutho sa luyo ang wala mailhing lalaki dayong pusil sa makadaghang higayon tumong sa lawas.

Si Medel daling gidala sa Julio Cardinal Rosales Memorial Hospital ug gibalhin lang dayon sa usa sa mga tambalanan dinhi sa dakbayan sa Sugbo.

Sa pagkakaron ang kapolisan padayon pa sa ilang imbestigasyon aron mailhan ang responsable niini.