Bolahanan sa jueteng gironda sa polis

Gidudahang "bolahanan" sa sugal nga jueteng ang gironda sa kapolisan sa Guadalupe police station niadtong milabay'ng gabii nga miresulta sa pagkaaresto sa unom ka mga tawo ug pagkasakmit sa mga butang nga gidudahang maoy gamiton sa maong operasyon.

Ang pagpangronda gipanguluhan ni Senior Inspector Catalino Nacario, hepe sa Guadalupe police station pinasikad sa search warrant nga giluwatan ni Municipal Trial Court and Cities Branch 3, Judge Gil Acosta batok sa kang Cristita Campomanes diha sa sudlonong bahin sa kabalayan sa sitio Epra diha sa maong barangay sa may dalan B. Rodriguez.

Si Campomanos maoy gidudahang operator sa maong sugal diha sa maong dapit nga dunay mamustahay gikan sa nagkadaiyang dapit dinhi sa dakbayan.

Unom ka mga lalaki ang nangadakpang gidudahang may kalambigitan sa operasyon sa maong sugal nga sila si Jose Abarrientos, 57, Alfredo Gabutan, 33, Ferdinand Campo, 40, Allan Fernandez, 22, ug duha ka mga anak ni Campomanes nga sila si Jeffrey 20 ug Jake 22, pulos mga residente sa maong dapit.

Samtang si Campomanes ug usa ka Aries Abarrientos wala na maabti sa kapolisan kinsa gituuhang maoy nakadala sa ubang mga ebidensya.

Sumala pang PO1 Jerson Libatan sa pakighinabi sa Banat News, nga dugay ng gipanid-an nila ang operasyon ni Campomanes apan niadtong gabhiuna lang nila kini kahimoi og operasyon.

"Dugay na ning gi-surveillance pero naulahi man gud og gamay ang informant pagsulti dinhi namo, positive gyud ni unta gabii pero sudlonon man kaayo unya ang lugar nga agaln mura man og dunay mga kontak sila didto," asoy pang Libatan.

Nakuha diha sa maong ronda ang mga giingong gamiton sa pagbola sa maong sugal nga usa ka calculator, yellow pad nga papel, duha ka bundle nga stub, 12 ka brown nga envelope, usa ka botelya, stapler, duha ka stamp nga dunay mga numero, ballpen, lamesa ug tally sheets.

Walay nakuhang kwarta nga pusta ang kapolisan sa maong ronda ug gituuhang nadala kini sa duha ka nangikyas.

Ang mga dinakpan gitanggong karon sa Guadalupe police station alang sa pagpasaka og kaso.

Si Sr. Inspector Nacario mitug-an sa Banat News nga tulo ka balay ang ilang gipanid-an base usab sa gitug-an sa ilang impormante nga maoy dapit diin bolahon ang maong sugal.

Sumala pa ni Nacario nga ang maong duwa gitawag dinhi og "lo-go" diin duha ka numero ra ang resulta nga susama og daugon sa iligal nga sugal usab nga masiao diin ang piso modaog og P400.

"Ang tawag nila adto lo-go, ang style sa pagbola mura man sad sa jueteng pero duha ra ka numero, diha ra man daw sa ilang lug ar ang operasyon," asoy pa sa opisyal.

Nagtuo ang opisyal nga dunay dakong nagpaluyong financier ang grupo apan wala pa nila kini mailhi.

Kasong paglapas sa Akta Republika 9287 kon Anti-Illegal Gambling Law ang ilang ipasaka batok sa mga nadakpan samtang gitun-an usab ang pag-apil sa kiha sa duha ka nakaikyas.

Niadtong pipila na ka bulan ang milabay gironda sa kapolisan ang usa ka dapit diha sa barangay Guadalupe diin nasakmit usab ang mga gamit sa pagbola sa gituuhang jueteng.

Daan nang mihimakak ang lokal nga kapolisan nga dunay operasyon sa maong sugal gawas lang sa masiao ug mga tigbakay dinhi kini bisan pa man sa daghang mga makumpiskang mga tipsheets diha sa mga gagmay'ng tindahan sa kadalanan.