Mga kawatan sa Talisay higpit gibantayan

Padayon pa sa paghipos og mga impormasyon ang kapolisan sa Talisay kabahin sa sunod-sunod nga insidente sa kawat sa siyudad.

Si Police Superintendent Romeo Perigo, hepe sa kapolisan sa siyudad, mibutyag kagahapon sa Banat News nga aduna na silay mga suspek apan padayon pa silang nagtigom og impormasyon batok sa maong mga suspek para mapasakaan kini og kaso.

Apan wala ibutyag ni Perigo ang mga ngalan sa mga suspek aron dili maapektohan ang ilang operasyon.

Ang hepe miawhag sa mga Talisaynon nga magmabinantayon ug kung aduna kini mabantayang mga tawo nga moanha sa ilang lugar nga madudahan ang lihok itaho gyud dayon kini sa kapolisan aron mapakgang kung aduna kini dautang plano.

Gibutyag ni Perigo nga adunay mga suspetsado sa pagpangawat nga dili taga Talisay apan aduna kini mga kauban nga taga Talisay kinsa maoy mogiya.

Uban sa maong mga kawatan napugos sa pagpangawat tungod kay wala kini laing panginabuhian apan ang uban niini tungod sa ilang mga bisyo.

Si Perigo nanghinaot nga masulbad na unta ang problema sa ekonomiya para daghang makasulod og trabaho ug momenus na ang mga mahitabong krimen.

"Kung naay law enforcement, naay economic activity," ni Perigo pa.

Bag-o lang, duha ka residente sa siyudad ang gikawatan og sobra sa P800 mil nga mga alahas, salapi ug butang.

Ang mga biktima mao ang magtiayong Jude ug Marilyn Buencanejo, mga residente sa Southwinds Subdivision, Barangay Cansojong.

Ang magtiayong Buencanejo nawagtangan og sobra sa tunga sa milyon nga mga alahas, salapi ug butang.

Ang sunod nga biktima mao si Genara Burlat, taga Sea view Heights, Lawaan I kinsa nawagtangan usab sa iyang mga alahas ug salapi nga mikabat sa sobra P300 mil