Nahimo nang tradisyon nga ang mga pasyenteng moanha sa mga health center para magpa-check up o magpatambal mohatag og donasyon ug ang maong mga donasyon anha isulod sa lata nga ibutang ibabaw sa lamesa sa personnel sa health center.
Usa sa health personnel ang mibutyag nga ang maong mga donasyon tigumon aron ipalit sa mga kuwang nga tambal nga gikinahanglan.
Si Talisay City Legal Officer Aurora Econg miawhag nga kinahanglang hunongon na ang paghatag sa mga pasyente sa health center og mga donasyon.
Si Econg mibahad nga ipahibawo niya ni Mayor Socrates Fernandez ang maong insidente ug sa buhatan sa City Health Officer para mahunong na kini.
Ang maong insidente nabutyag human miduso og reklamo si Shonie Guitchie batok sa usa ka Midwife sa Barangay Mohon kinsa gikatahong mangayo og bayad kada mopahigayon kini og transaksiyon ngadto sa mga pasyente.
Matud ni Econg nga awhagon niya si Fernandez nga moluwat og memorandum para mahunong na ang pagpanawat og donasyon sa mga pampublikong health center sa siyudad.
Gibutyag sa City Attorney nga ang siyudad migahin matag tuig og dakong kantidad nga salapi para sa maintenance ug mga tambal sa health department sa pagsiguro nga ang mga lumulupyo sa siyudad mahatagan og medical care ug ang tanang kawani sa health centers nagdawat kini og sweldo.
Sa laing bahin, si Konsehal Sergio "Serrie" Restauro kinsa tsirman sa komitiba sa panglawas nagkanayon nga ang mga donasyon tigumon kini para sa pagpa-ayo sa mga medical equipment nga maguba tungod kay modangat pa sa dugay'ng panahon kung ang mga health center maghuwat sa kagamhanan nga maoy mopaayo sa mga naguba nga ekipo og makaapekto kini sa ilang serbisyo ngadto sa publiko.
Gibutyag ni Restauro nga kuwang sa pinansiyal nga suporta ang mga pampublikong health center ug dili paigo ang budget nga gigahin niini.