Gika'g bilar sa patay gibanhigan

Gibanhigan ug napatay sa duha ka wala mailhing mga lalaki ang usa ka Chief Engineer sa usa ka tugboat samtang naangol usab ang kauban niini diha sa eskina sa mga dalan Zamora ug Burgos sa Centro dakbayan sa Mandaue kagahapon sa kaadlawon.

Ang biktima mao si Amelito Rivera, 42, minyo, nagpuyo sa Labugon sa maong dakbayan ug maoy giingong chief engineer sa tugboat nga M/T Matibay nga iya sa San Miguel Corp.

Samtang ang naangol mao si Isosiles "Susing" Rivera, 39, minyo nga lumad sa lungsod sa Bogo.

Base sa pamahayag ni Isosiles nga samtang gikan sila nagbilar sa haya sa ilang ig-agaw nga si kanhi SPO4 Roy Codeñera sa Tipolo, ila pang gihatod ang ilang kabanay sa sitio Tribunal sa Centro Mandaue.

Human niadto namauli na sila agi sa maong dapit sa luyo nga bahin sa Mandaue City Hall apan duha ka tawo ang mipusil ngadto kanila samtang luwan sa ilang multicab diin si Amelito maoy nagmaneho.

Gikatahong human maigo si Amelito gitiwasan kini sa mamumuno gamit ang usa ka kalibre .45 nga pistola hinungdan sa samad pinusilan sa iyang bukton ug dughan hinungdan sa iyang hinanaling kamatayon.

Gidali unta sila og dala sa Mandaue City Hospital apan gideklarar si Amelito nga dead on arrival samtang gitambalan usab ang samad pinusilan sa walang paa ni Isosiles.

Sa imbestigasyon ni SPO1 Wynne Ompad sa MCPO Station 1 nasuta nga adunay unom ka mga kabhang sa kalibre 45 sa dapit nga nahitabuan ug gidudahan nga naalaan lang si Amelito sa mga suspetsado sanglit adunay laing panghitabo sa pagpamusil sa maong dapit sa wala pa banhigi ang duha.

Ang asawa sa namatay nga si Jovy Rivera mitug-an sa mga polis nga wala siya'y namatikdang kaaway ang iyang bana, samtang ang iyaan sa duha nga si Yolalia Rivera mitug-an nga ang iyang anak nga si Mario maoy gihatud sa duha gikan sa pagbilar apan wala magdahum sa insidente.

Hangtod ning pagbalita wa pa hisayri sa kapolisan kung unsay posibleng motibo sa pagpamanhig.

Una pa ang pagpamanhig, nasuta nga usa ka tawo ang gipusil sa likod nga bahin sa buhatan sa BID 7 ug sa dihang milabay ang mag-agaw sa maong dapit, sila na pud ang gipusil niini.