Dinuphanay nagpabilin

Bisan pa sa pagsiaw sa mga sunodsunod nga tulis sa nagkalain laing establisamento ug indibidwal dinhi sa dakbayan sa Sugbo niining nangaging mga adlaw pabiling giduphan ni Mayor Tomas Osmeña ang hepe sa Cebu City Police Office Supt. Melvin Gayotin aron magpabilin sa mao niyang katungdanan.

Alang sa mayor ang mga Sugbuanon maoy angay pangutan-on ug padesisyonon kun kontento pa ba kini o dili sa seguridad karon dinhi sa dakbayan kun itandi niadtong mga nangaging bulan ug katuigan.

Hinuon giangkon ni Osmeña nga medyo mikunhod gyud og 9 porsyento ang grado nga iyang gihatag kabahin sa performance sa kapolisan niining nangaging mga adlaw nunot usab sa mga sunodsunod nga nahitabong krimen.

Apan alang sa mayor dili pa kini igong basehanan aron iyang pahulipan si Supt. Gayotin pagka-hepe sa kapolisan dinhi sa dakbayan.

Nasayran nga ang mga sakop sa konseho sa dakbayan mipadayag kini sa ilang kadismaya sa performance sa kapolisan pagsumpo ug pagsulbad sa mga mitumaw nga krimen ilabi na gyud ang suliran sa vigilante killings nga miabot na og 179 ka gituohang ex-convict ug notadong kriminal ang gitumba niini.

Apan matud sa mayor wala siyay pormal nga reklamo nga nadawat gikan sa konseho nga nipadayag sa ilang kadismaya sa gipakitang performance karun sa kapulisan dinhi sa dakbayan.

Nasayran nga si Osmeña kaniadto pang midupa ni Supt. Gayotin pagka-hepe sa kapolisan bisan pa man og giparelibohan na unta kini sa Camp Crame tungod kay dili pa kwalipikado nga mahimong permanenting hepe sa kapolisan sa usa ka highly-urbanized city sama sa siyudad sa Sugbo.