Duha ka mamunitay basura giluba; usa patay

Wala na kaabot buhi ang usa ka mamunitay og basura samtang samdan usab ang laing usa human sila lubaa sa usa ka mamunitay gihapon og basura nga nasuko gumikan sa pasangil nga nanikas ang naangol sa pag-referee sa billiard niadtong milabay'ng adlaw.

Ang namatay giilang si Armando Ocampo,33, kinsa nakaangkon og usa ka samad dinunggaban sa tiyan human lubaa ni Reynaldo Bautista, hingkod ang panuigon ug residente sa gikahitaboan, samtang naangol usab si Joel Unsabia, 27.

Ang insidente nahitabo sulod sa usa ka bilyaran sa White Road sa barangay Inayawan ning dakbayan diin si Unsabia maoy nag-referee tali sa mga mamasurahay nga nanuwa nga ang usa naila lang sa ngan nga "Pitlok" Balaran batok sa usa ka wala mailhing basurero.

Matud pa nga ang suspek kinsa usa sa mga nanan-aw sa duwa napikal kang Unsabia ug mipasangil nga nanikas kini sa pag-referee hinungdan sa mainitong panaglalis.

Nianang tungura kalit nga milanit og kustilyo si Bautista ug gidunggab si Unsabia apan nasawo kini sa walang kamot sa gidunggab hinungdan sa pagkasamad niini ug misuway og dagan apan giusban kini og dunggab sa suspek hinungdan sa pagkatampok sa likod niini.

Si Ocampo kinsa usa gihapon sa mga nanan-aw daling mialam-alam sa suspek apan gikatahong gihansakan hinuon kini ni Bautista sa tiyan, human makadunggab daling misibat ang suspek apan nadakpan siya sa mga mirespondeng sakop sa Mobile Patrol Group nga sila si PO2 Joselito Las Piñas, PO1 Roderick Francia ug PO1 Joseph Dagatan.

Samtang ang duha ka samaran gidala sa mga tanod sa Inayawan ngadto sa Cebu City Medical Center apan patay nang nadangat si Ocampo.