P80T nga cable wire gipangawat

Mokabat sa P80,000 nga kantidad sa mga cable wire sa Philippine Long Distance Company (PLDT) sa dalan M.C. Briones sa Cabancalan, dakbayan sa Mandaue gipangawat.

Si Jose Valera, security officer sa PLDT, mipadangat sa maong taho niadtong miaging adlaw sa Presinto 4 sa Casuntingan Police Station.

Matud pa ni Valera nga ilang nadiskubrehan ang pagkahanaw sa maong mga cable wire tungod sa ilang nadawat nga daghang reklamo.

Si SPO1 Ariston Bataluna sa kapolisan sa nahisgotang presinto nga gikahinabi sa Banat News miingon midagsang ang reklamo sa mga konsumedor sa PLDT sanglit kalit lang naputol ang linya.

Dihang ilang gisusi maoy ilang nasayran nga ang linya sa ilang telepono nga gitaod sa poste gipamutol sa wala mailhing mga tawo ug gipangawat.

Sa nasayran nga ang Oplan Kable Task Force gitukod karon ni Mandaue City Police Director Sr. Supt. Eduardo Catabas Jr.

Ang maong pundok nga gisakpan sa kapolisan maoy mohimo og patrolya sa panahon sa kagabhion alang sa pagpakgang sa mga pagpangawat sa mga cable wire sa PLDT, Visayan Electric Company ug mga telecommunication company.