Pagputol sa incentive sa Carbon di idayon

Dili na mahinayon ang planong pagputol sa tagsa ka libo ka pesos nga incentive allowance matag bulan nga gihatag sa siyudad ngadto sa tanang mga polis nga nadestino sa Carbon Police Station-5.

Kini human giklaro ni Mayor Tomas Osmeña nga dili kini maoy iyang gihatagan og prayoridad pagkakaron ug labaw sa tanan wala pa usab siyay nahimong aksyon human gipahibalo niini ang pagsuspenso sa incentive allowance sa kapolisan sa Carbon sulod sa tulo ngadto sa unom.

Tungod kini sa kapakyas sa maong mga polis pagbungkag sa suliran sa video karera sa barangay Ermita dihang nakasakmit ang mga sakop sa Criminal Investigation and Intelligence Bureau dul-an sa 40 ka video karera sa pagpangronda niini niadtong miaging bulan.

Nasayran nga si Supt. Melvin Gayotin, hepe sa Cebu City Police Office (CCPO), nagtinguha nga mohangyo ngadto sa mayor aron irekonsiderar niini ang nahaunang desisyon nga pagkanselar sa incentive allowance sa maong mga polis.

Ang hepe sa Carbon Police Station Supt. Eliseo Castronuevo una nang mipadayag atol sa milabay'ng executive session sa konseho nga nakahatag na siya og mga pagpasabot may labot sa maong isyu ngadto sa ilang labaw nga si Supt. Gayotin.

Wala na mohatag og dugang komentaryo si Castronuevo gawas sa pag-ingon nga ni-kooperar sila sa maong gipahigayong pagpangronda sa CIIB sa Ermita.