Dili dengue ang gikamatyan sa 2 anyos

Si Konsehal Sergio Restauro mihimakak nga dengue ang hinungdan sa pagkamatay sa usa ka batang lalaki bisan pa og nabutang sa death certificate niini nga dengue ang hinungdan sa kamatayon tungod kay wala kini medical certificate.

Ang biktima giila nga si Emilio Cerna II taga Sityo Crosan, Barangay Bulacao, Talisay kinsa magsaulog unta sa iyang ikatulo ka tuig nga birthday.

Matud ni Restauro nga wala mapiho kung dengue ba ang hinungdan sa kamatayon ni Cerna tungod kay wala kini medical certification gikan sa usa ka doktor.

Si Leah Cabuguas, konsehal sa maong barangay nagkanayon nga ang pamilya ni Cerna wala usab makasiguro kung dengue ba ang namatyan niini tungod kay wala nila dalha sa hospital ang biktima kinsa nakasinati og hilanat sulod sa tulo ka adlaw.

Si Flor Burbos, kalihim sa barangay mibutyag nga si Cerna didto gidala sa iyang pamilya sa usa ka mananambal dihang luya na kaayo.

Si Restauro ug mga staff niini misusi sa lugar para pagpiho sa taho nga adunay mga bata ang gipanghilantan og posibleng aduna kini dengue.

Gitataw sa konsehal nga wala siya'y nakitang dunay sakit nga dengue sa mga bata nga iyang gi-check-up.

Kahinumduman nga ang komitiba sa panglawas nga gipangulohan ni Restauro mipahigayon og lig-ong kampaniya batok sa dengue sa mga barangay sa siyudad.