Mark Jimenez midonar

Kontrobersyal nga si Mark Jimenez miduaw sa Sugbo ug nakigtagbo ni Cardinal Vidal aron hisgutan niini ang iyang tuyo nga pagpanghatag og rosaryohan ug holy water sa mga bata dinhi.

Si Jimenez miklaro nga walay bulok politika ang iyang gihimo ug nanghinaot kini malamdagan ang panghuna-huna sa iyang mga kontra sa politika.

Matud pa niya ang pagpanghatag og rosaryohan ug holy water ngadto sa mga tawo dugay na kini niya gibuhat.

Sa dihang gipangutana kini kalabot sa politika nagdumili kini sa pagtubag.

Ugma sa buntag si Jimenez moadto sa Mabolo aron manghatag og rosaryohan ug holy water sa mga bata nga dili momenus sa 4,000 ngadto sa 6,000.

Gikan dinhi modiretso dayon kini ngadto sa Davao City aron usab sa pagbuhat sa susamang pagpanghatag og rosaryohan ug holy water.

Si Jimenez kanhi Kongresista sa ika-unom nga distrito sa Manila ug nahimomg kaalyado sa gipalagpot nga pangulo sa nasud nga si Joseph Ejercito Estrada.

Pipila na ka bulan ang milabay gidakop si Jimenez sa mga awtoridad sa Amerika tungod sa pag-apil apil niini sa mga kampanya sa mga politiko sa maong nasud ug gipabalik dinhi sa Pilipinas.