P300mil kantidad sa gikawat

Sobra sa P300 mil ang kantidad sa mga alahas, salapi ug butang ang nadala sa wala mailhing kawatan gikan sa duha ka residente sa Talisay.

Nahitabo kini kagahapon sa buntag ug niadtong Martes sa hapon diha sa duha ka barangay sa nahisgutang siyudad.

Ang mga biktima giila nga si Genara Burlat, 35, taga- Seaviews Heights, Lawaan I ug Alo Cose, 47, residente sa Friendly Homes, Mansueto, Bulacao.

Si Burlat daling mitaho diha sa kapolisan sa Talisay ug mipasangil nga usa ka "Helen" kinsa misulod isip katabang nila maoy midala sa iyang mga alahas nga dunay batong diamond ug perlas nga mikabat tanan sa P300 mil ug P3 mil nga salapi.

Si PO1 Jerome Noval sa Talisay Police Station kinsa usa sa mipahigayon og imbestigasyon sa maong insidente mibutyag kagahapon sa Banat News nga si Helen kinsa giingong lumad nga taga Negros miduol sa pamilyang Burlat niadtong Martes tungod kay gusto kining mosulod isip katabang.

Naatol nga ang pamilyang Burlat nanginahanglan og katabang hinungdan nga gidawat sa inahan ni Genara si Helen.

Kagahapon sa buntag nagsugod sa iyang serbisyo si Helen ug gilutoan pa niini og pagkaon ang iyang mga bag-ong amo.

Apan nabantayan na lang ni Genara nga wala na ang iyang mga alahas ug salapi nga gisulod og gamay'ng bag ug gibutang diha sa drawer sa iyang kwarto ug lakip si Helen nawala usab.

Gituhoan nga si Helen diha molayat sa pader dapit sa kwarto ni Genera.

Gihulagway nga tabonon ang pamanit ni Helen ug tul-id ang buhok niini.

Sa laing bahin, dali usab nga mitaho sa kapolisan si Cose. Kabahin sa nahitabong lungkab sa iyang balay niadtong Martes.

Nadala sa tulo ka wala mailhing lalaki ang salapi ni Cose nga nagkantidad og P10 mil, digital camera P24 mil ug mga alahas nagkantidad P20 mil.

Base sa imbestigasyon sa kapolisan sa siyudad nga giguba sa mga kawatan ang birha sa bintana sa likod nga bahin sa balay ni Cose hinungdan nga nakasulod kini ug nakuha ang maong mga butang ug salapi.

Ang kapolisan sa siyudad mipahigayon og follow-up sa maong mga insidente.