Si Konsehal Hilario Davide III mipahibalo atol sa gipatawag nga executive session sa konseho kagahapon nga gitambungan sa mga station commander sa onse ka presinto sa kapolisan dinhi sa dakbayan ug sa director sa Cebu City Police Office (CCPO) Supt. Melvin Gayotin nga dunay suod niyang higala nga andam og tagana nga mohatag og P500 mil masulbad lang sa kapolisan ang imbestigasyon sa vigilante killings.
Ang hepe sa Criminal Intelligence and Investigation Bureau (CIIB) chief Supt. Paul Labra mipadayag nga dako og ikatabang ang maong ganti aron madasig ang mga saksi nga mopatin-aw ug motug-an sa kapolisan sa ilang nahibaw-an aron matumbok ang responsable sa vigilante killings.
Apan giklaro ni Labra nga bisan pa man og walay ganti padayon gihapon ang imbestigasyon sa kapolisan sa maong vigilante killings apan iyang giangkon nga hinay ang dagan sa imbestigasyon tungod sa minos nga kooperasyon sa mga saksi ug sa pamilya sa mga biktima sa krimen.
Pagkakaron gibanabanang miabot na og 179 ka mga ex-convict ug gituohang notadong kriminal dinhi sa dakbayan ang gitumba sa nagpailang vigilante sukad niadtong bulan sa Disyembre tuig 2004.
Si Bise Mayor Michael Rama sa iyang bahin, mipadayag nga dili siya makakomentaryo kun epektibo ba o dili ang paghatag og ganti aron matumbok ang pundok sa vigilante apan iyang giklaro nga gikinahanglan gyud nga masumpo ug mahunong na ang sunodsunod nga summary killings.