Magtiayon naaksidente, asawa patay

Patay ang usa ka 52-anyos nga ginang human ang gisakyan niining motorsiklo ug sa iyang bana gibanggaan og laing sakyanan diha sa Barangay Bulacao, dakbayan sa Talisay.

Ang suspetsado mipasutoy sa gimaneho niining sakyanan pahilayo sa lugar nga nahitaboan ug padayon pa kining gipangita sa mga polis.

Ang mga biktima giila sa kapolisan sa siyudad nga si Marrie ug Wilfredo Mapoy mga residente sa Barangay Buhisan niining dakbayan.

Ang magtiayong Mapoy daling gidala diha sa Talisay district hospital apan gideklara sa doktor nga patay na nga naabot sa tambalan si Marrie.

Si Wilfredo gibalhin diha sa Vicente Sotto Memorial Medical Center niining dakbayan.

Si PO3 Elmer Saladas, traffic police sa siyudad mibutyag kagahapon sa Banat News nga ang magtiayong Mapoy nagbiyahe gikan sa dakbayan sa Sugbo paingon diha sa Tabunok kalit kining nabanggaan og laing sakyanan hinungdan nga natumba ang motorsiklong gisakyan sa mga biktima.

Nalabay diha sa karsada ang magtiayong Mapoy ug nakaangkon og grabeng kadaot sa lawas si Marrie ug gituhoan nga maoy hinungdan sa kamatayon niini.

Show comments