Ang baha nga dunay giladmong kutob sa hawak miguba sa tulo ka balay nga duol sa sapa diha Sitio Quadra.
Ang mga residente sa Lagtang nag-antos karon og agi sa taga tuhod nga giladmong lapok sa ilang karsada.
Si Kapitan Celiapo Cabuenas sa Lagtang mibutyag nga kusog kaayong bul-og sa tubig baha nga naggikan sa bukirang bahin sa lugar ang hinungdan nga naguba ang tulo ka balay tungod kay miawas man ang sapa diha sa Sitio Quadra.
Ang City Social Welfare and Development (CSWD) mihatag na og ayuda sa mga pamilya nga nagpuyo sa mga balay nga naguba.
Si Cabuenas nagkanayon nga aduna pay mga balay ang naa diha duol sa nahisgutang sapa nga kuyaw usab kaayo kining maanod sa baha.
Ang mga opisyal sa barangay naghuwat una sa finding sa CSWD una pa sila mopahigayon og aksiyon.
Ang kapitan mipasangil sa padayong construction sa subdivision diha sa ibabaw'ng bahin sa ilang lugar nga maoy hinungdan sa "flash flood".
Matud ni Cabuenas nga makig-estorya sila kabahin sa ilang problema sa developers sa maong subdivision kun mapamatud-an sa findings sa CSWD nga mao kini hinungdan sa baha.
Si Cabuenas ug ang mga residente sa lugar nabalaka nga aduna pay laing baha ang moigo diha sa ilang lugar ug maatol sa gabii ang insidente nga nakahatag og peligro sa ilang mga kinabuhi.
Niadtong kalag-kalag ang karsada sa maong barangay dili gyud maagian tungod sa ka lawom sa lapok hinungdan nga ang mga residente nagtinabangay og pala sa lapok.
Ang kagamhanan sa siyudad mipadala og heavy equipment aron matabangan ang mga residente sa pagpadaplin sa mga lapok diha sa karsada aron maagian kini.