Kini ang pamahayag ni Patalinghug atol sa pakighinabi sa Banat News niadtong pagsaulog sa adlaw sa mga santos didto sa sam-ang Katoliko sa Humay-Humay diin tupad kaniya si Pie Weigel.
Matud pa ni Patalinghug nga sa ngalan sa katawhan sa dakbayan sa Lapu-Lapu nakahukom siya sa pagdagan pagka-mayor sa dakbayan sa sunod tuig 2007 ug hugot usab ang suporta ni Pie Weigel, ang asawa sa namatay nga si kanhi Mayor Ernest Weigel Jr. ug sa iyang pamilya.
Matud pa ni Patalinghug nga duna na silay kumpletong line-up sa mga kandidato sa umaabot nga eleksiyon apan ila pa una kining hapsayon ang plastada sa mga kandidato.
Usa sa gituhoang modagan pagka-konsehal mao si Ernest Luke "Boboy" Weigel nga anak ni Pie, Dr. Michael Ouano nga anak ni Dra. Corazon Ouano, kanhi Kongresista sa siksto distrito nga si Efren Herrera.
Ang panag-uli sa pamilyang Patalinghug ug Weigel, Ouano ug Herrera maoy usa sa mga paagi nga matunhay na unya ang pagdumala sa kagamhanang lokal sa dakbayan sa Lapu-Lapu nga diin naputos sa kontrobersiya niining panahona, matud pa ni Patalinghug.
Kahinumduman nga sa milabay'ng eleksiyon sa 2004 nagka-atbang si Pie Weigel, Dra. Corazon Ouano ug Efren Herrera pagka-mayor sa dakbayan sa Lapu-Lapu batok kang incumbent Mayor Arturo "Boy" Radaza.
Silang tanan miakusar nga adunay tikas nga nahitabo sa milabay'ng eleksiyon diha sa Lapu-Lapu, apan niining pag-alayon sa mga dagkong politiko sa dakbayan sa Lapu-Lapu sila nanghinaut nga mahigmata na ang katawhan sa tibuok isla sa Mactan.