2 polis gisuspenso 90-adlaw tungod sa kamatayon sa lender

Gisuspenso og 90 ka adlaw ang duha ka mga polis sa Cebu City Police Office nga gilambigit sa pagpanulis ug pagpatay sa usa ka money lending firm diha sa dalan T.Padilla extension ning dakbayan.

Ang Police Regional Office 7 mipagawas sa suspensyon batok nila ni SPO1 Elmo Rosales ug SPO1 Mateo Yanson kinsa kaniadto parehong gidestino sa Fuente Osmeña police station.

Ang suspensyon pinasikad sa special order 1145 gipagawas tungod sa kasong administratiba batok sa duha kabahin sa pagtulis sa PRH Lending Investment Incorporated niadtong Septiyembre 9 diin ang tag-iyang si Pilar Hernandez,62 ug sekretaryang si Wevina Pancho,55, gipatay sa nag-inusarang tulisan nga gitumbok nga si Yanson.

Si Rosales gilakip sa kaso isip kakunsabo ni Yanson sanglit sumala pa sa mga imbestigador usa siya sa mga mihipos sa armas nga gigamit sa krimen uban usab ang ilang police asset nga si Troy Diago.

Sumala pang Cebu City Police Office acting director Melvin Gayotin, ang suspensyon gidesisyunan sa director sa Regional Personnel Human Resource Development (RPHRDD) nga si Sr.Supt. Alex Castro ug Regional Internal Affairs Service -7 director Sr.Supt. Rolenson Grejaldo nga giaprubahan usab ni Chief Supt. Silverio Alarcio niadtong Oktobre.

Sugod niadtong Nobiyembre 1 kutob sa Enero 29,2007 ang maong suspensyon nga walay dawatong sweldo ug bonus ang duha ka polis.

Si Supt. Gayotin mitug-an nga tagaan og kopya si Rosales sa maong suspensyon sanglit gidestino man kini ngadto sa buhatan sa Mobile Patrol Group samtang ang kadagkoan sa Regional Service Security Group na sa PRO7 maoy motunol sa kang Yanson.

Ang duha daan nang mihimakak sa pasangil apan ang imbestigador sa Homicide Section kusganong mibarog nga lig-on kaayo ang pisikal ug sirkumstansyal nga mga ebidensya batok kanila inubanan sa mga pamahayag sa mga testigo.

Usa sa mga lig-ong ebidensya nga gitumbok sa mga polis mao ang gisuwat ni Pancho gamit ang iyang kaugalingong dugo diha sa lamesa nga giingong apelyedo ni Yanson ug ang armas nga gigamit nga mitakdo tanan sa mga laboratory examination.

Matud pa sa kabanay ni Hernandez dul-an usa ka milyon ang nadala sa tulisan niadtong tungora.

Ang maong kaso kasamtangan pang nagpaabot sa korte alang sa pagdungog.