Ang biktima mao si Balasbas Luzon Ibarita, 57 anyos, minyo ug nagtrabaho isip laborer sa maong dapit.
Ang suspetsado mao si Romulo Muling Cadula, 49 anyos, minyo, walay trabaho ug nagpuyo sa maong dapit.
Si PO1 Roberto Rondina sa homicide section sa kapolisan sa maong dakbayan nga gikahinabi sa Banat News nga nangahubog na ang biktima ug ang suspetsado dihang kalit lang naglalis.
Nagloklok diay og kutsilyo ang suspetsado kinsa dihang wala na makapugong sa iyang kasuko kalit lang niining giibot ug gihansak sa biktima.
Dugang pa ni PO1 Rondina nga unom gayod ka samad sa lawas ang naangkon sa biktima nga naglakip sa duha sa dughan, duha sa kilid ug duha usab sa buko-buko.
Matud pa niya ang biktima dali untang gidala sa Mactan Doctor Hospital apan gideklarar kini sa mga doktor nga patay na kining nahidangat kanila.
Sumala ni Rondina nga ang suspetsado kinsa mitahan sa iyang kaugalingon ngadto kanila ang gitanggong na karon sa bilanggoan ug ang kasong murder maoy ilang giandam sa korte batok niini.