Sa bahin sa 20 ka mga tanod sa barangay Pahina San Nicolas, si Kapitan Victoriano Go miingon nga gumikan sa kaapiki sa mga tanod, gibaligya nang uban nilang dawatonon ngadto sa mga tigpatanto.
Matud pa ni Go nga makadaghan na niya panilnga si Konsehal Eugenio Faelnar, ang Presidente sa Association of Barangay Councils ABC apan misaad kini nga dili na madugay.
Miingon si Go nga nagpunay nag paabot ang mga barangay tanod, ug hapit na mawad-ig paglaom kay nagtuo nga dili na nila kini mapuslan pa.
Ang barangay maghatagan og P400 nga honorarium ngadto sa ilang mga tanod matag buwan, agig tugbang sa P800 nga iya sa City Hall matag buwan.
Matud pa ni Go nga ang nadawat ra sa mga tanod mao ra ang gikan sa barangay sukad niadtong Enero ning tuiga, samtang ang P800 nga gikan sa City Hall, wa gyud madawat.
Sa pagkakaron, si Go nagkanayon nga walay puas ang ilang pagpahinumdom kang Faelnar kalabot ning mga butanga aron dili matahap ang mga tanod nga gibinuangan sila.