3 batang babaye gigamit sa operasyon, nasakpan

Gituohang planong pagtulis sa tulo ka mga estabilisamento lakip na ang posibilidad nga sulngon ang Police Station sa Talamban police station napugngan tungod sa ikmat kaayong gwardiya sa usa ka pawnshop diha sa maong dapit niadtong Domingo.

Niadtong Oktubre 30,2006, usa ka kawani sa Cebuana Lhuillier sa Talamban ang midangop sa Talamban police station kabahin sa namatikdan sa ilang gwardiyang si Marcelo Cogtas nga tulo ka batang babaye nga nagpunay og ihap ug milista sa mga kustomer nga mosulod gawas sa ilang patantuhan.

Gikatahong lakip na ang lumalabay diha sa atubangan sa ilang pawnshop sukad sa alas 9 sa buntag hangtud sa alas 2 sa hapon giapil og lista.

Nianang pagkahapon nakit-ang may duha pa ka batang mihatud og pagkaon sa usa sa mga menor nga nanglista nga nagposte diha sa atbang sa Cebuana Lhuillier, singkwenta metros gikan sa police station, hinungdan nga ila kining gipahibalo sa kapolisan.

Dangtan pagkahapon, mitug-an ang bata nga ang iyang inahan usa ka barangay tanod sa Talamban kinsa gipatawag dayon sa kapolisan, matud pa sa inahan nga giduol lang siya sa kaubang kawani sa barangay nga si Alma Seno kung gusto ba niining makakwarta ang iyang anak.

Gikatahong usa ka giila lang sa ngalan nga "Ipay" nga may kaubang giila lang sa ngalan nga Gladys ug Dona maoy misugo kaniya sa pagpanglista bugti sa P200 matag adlaw nga suhol sulod sa kinse ka adlaw.

Gikatahong si Dona ug Gladys maoy naniid sa M.Lhuillier pawnshop ug sa bangko sa RCBC niadtong tungora apan dihang nakit-ang gidala sa mga polis ang bata sulod sa police station daling miikyas ang duha.

Matud pang Senior Inspector Claudio Casiban, ang hepe sa Talamban police station sa pakighinabi sa Banat News nga posibleng dunay dautang plano ang grupo ug gigamit lang ang bata.

Gisuwayan og tawag ang telepono ni Ipay apan wala gyud kini motubag bisan sa mga text nga gipadala sa kapolisan.