LPG gituohang hinungdan sa sunog

Mokabat sa P700, 000 ang danyos sa nahitabong sunog sa naugdaw nga commercial building sa dalan Maximo Patalingjug, Pajo, dakbayan sa Lapulapu nga ang hinungdan mao ang paghungaw sa tangke sa LPG.

Si SF03 Pepito Andales, imbestigador sa kabomberohan sa maong dakbayan nga gikahinabi sa Banat News miingon nga gipanag-iya sa negosyanteng James Tiro ang nasunog nga edipisyo.

Matud pa niya nga ilang nadawat ang alarma ala 1:58 ang takna kagahapon sa hapon ug ilang nakontrolar ang kalayo sa pagkalabay sa tulo ka minuto nilang pagpawong niini.

Dugang pa niya nga si City Fire Marshal Ricardo Cornillo, miisa sa 3rd level sa maong sunog nga maoy hinungdan sa paghidangat usab sa uban pang mga bombero sa pagtabang og pawong niini.

Sumala pa niya nga ang lakip sa mitabang kanila og pagpawong mao ang Mandaue City, Cordova, Emergency Rescue Unit Foundation (ERUF) ug uban pa.

Si SFO3 Andales miingon nga posibleng mihungaw ang LPG nga diha sa sulod sa maong edipisyo nga gituohang gidakop sa kalayo apan wala pa matino kung diin naggikan ang kalayo.

Gitug-an ni SFO3 Andales nga walay trabaho ug walay tawo sa maong edipisyo nga naangol ug kinabuhing nakalas atol da maong insidente.