2 lalaki nag-motor 'sikop; polis nasukmagan sa hubog

Arestado ang duha ka mga lalaking luwan sa usa ka motorsiklo human sa ginukdanay sa mga sakop sa Vice Control Section diha sa dalan General Maxilom niadtong milabay'ng gabii, samtang usa ka polis ang gisukmag sa hubog nga ilang gisitar diha sa dalan C.Padilla sa Duljo-Fatima sa linaing checkpoint niadtong Lunes sa gabii.

Ang gidakop giilang sila si Richard Ardiza Estores, taga Agpasan, barangay Binaliw ug Arnel Ubas Ardeno nga taga dalan Laurente sa Tejero ning dakbayan.

Ang grupo ni Sr.Inspector George Ylanan ug Inspector Michael Bastes mibutang og checkpoint diha sa nahisgutang dapit dihang nasigpatan ang duha luwan sa usa ka Loncin nga walay plaka apan sa ilang pagsitar misutoy sila og padagan.

Nahitabo ang ginukdanay ug wala magtuo ang duha nga sa unahan duna pay laing checkpoint nga nag-atang na sa mga suspek hinungdan sa ilang pagkaaresto.

Dihang girekisa, nakuha gikan sa duha og mga kutsilyo, parehong walay mga crash helmet, walay official receipt ug certification of registration nga napakita ang duha ug ang drayber nga si Estores wala say lisensya.

Samtang niadtong milabay'ng Lunes sa gabii nadakpan si Mark Chua Quevedo,22, nga taga B.Aranas Extension sa San Nicolas atol sa checkpoint sa Vice Control Section pinanguluhan ni Ylanan.

Si Quevedo luwan sa usa ka motorsiklo giingong wala mohunong sa pagpara kaniya sa mga polis gidudahan kining hubog apan sa pagdakop kaniya sa FTP nga naila lang sa ngan nga PO1 Marlon Perolina ug sa usa ka barangay intelligence network mikisi-kisi kini og di buot magpadakop hinungdan nga miduol usab ang laing FTP nga si PO1 Joel Dieparene.

Matud pang Ylanan nga imbes nga mopatuo kalit hinuon kining misukmag kang Dieparene ug misutoy apan sa pagdali-dali na-crash kini ug nasamad ang ulo.

Kasong Direct Assault, Resistance and Disobedience to an Agent of Person in Authority ug City Ordinance 1929 kun paghubog-hubog ang isang-at sa kapolisan batok kaniya.