Tedy wa malipay sa MCPO human matulis ang VECO

Wala malipay si Mandaue City Mayor Thadeo Ouano sa performance sa kapolisan sa dakbayan sa Mandaue nunot sa tulis nga nahitabo sa VECO Collection Office sa National Highway, Maguikay, Mandaue sa milabay'ng hapon.

Matud pa ni Ouano nga adunay mismanagement nga nahitabo sa MCPO ug wala na siya makasabot sa intelligence network sa kapolisan nga gipanguluhan ni Sr. Supt. Eduardo Catabas kun tinuod man ang presensiya sa mga tulisan nga gikan sa Mindanao ang gidudahang mitulis sa VECO.

Si Jonji Gonzales, tigpamaba ni Ouano, miingon nga nangita usab ang mayor sa performance sa mga sakop sa Intelligence Section sa MCPO gumikan kay mibubo pag-ayo si Ouano og gahin alang sa intelligence gathering sa kapolisan aron malikayan ang susamang panghitabo apan paltos gihapon.

Subay niini, gibasol usab ni Ouano ang management sa VECO gumikan sa kakompiyansa niini sa ilang mga personnel ug walay mga kahimanan nga dali ra mailhan kun adunay mahitabong tulis sa ilang buhatan.

Nasuta ni Ouano nga walay monitoring o surveillance camera ang VECO ug wala usab kini burglar alarm nga nagkutay ngadto sa duol nga presinto sa kapolisan ug kulang sa pamaagi ang VECO sa pag-remit sa ilang koleksiyon ngadto sa bangko hinungdan sa kadako sa nakuha niini nga kantidad.

Samtang si Sr. Insp. Abraham Ocampo, hepe sa Station 1 sa MCPO mipadayag nga ilang gipaubos sa "lie detector test" si Tomas Corpin, ang guwardiya sa VECO nga maoy naaktuhan atol sa tulis kun kini nagsulti ba sa tinuod atol sa ilang gihimong imbestigasyon.

Ang mga suspetsado nagsul-ob pa og uniporme sa VECO ug yano usab nga nakasibat sa bagang duot sa trapiko sa maong dapit nga wala mamatikdi sa mga sakop sa kapolisan nga nadestino sa maong dapit sa milabay'ng hapon.

Si Corpin mitudlo sa usa sa tulisan sa photo gallery sa Theft and Robbery Section sa Cebu City Police Office kagahapon.

Uban kang Sr. Insp. Ocampo ug Sr Insp. Ambrosio Ibones, hepe sa TRS, personal nga giukay ni Corpin ang mga hulagway.

"Kani sir susama gyud ug nawong," Corpin nagkanayon.

Matud ni Corpin nga andam siya mokooperar sa kapolisan aron mawagtang ang pagduda nga apil siya sa pakigkunsabo sa mga tulisan.