Ang 'ungo' sa tuburan

Daghan na ang mga estorya nga kabahin sa mga ungo. May mga giasoy sa atong katigulangan, mabasa nato sa mga horror story nga nobela, sa telebisyon ug mga pelikula nga sagad ipasundayag sa panahon sa pagsaulog sa kalag-kalag.

Sa lungsod sa Tuburan, nga nahimutang sa mokabat 90 ka kilometrong gilay-on gikan sa kinapusorang bahin sa dakbayan sa Sugbo may mga estorya usab kaniadto labot sa ungo.

Dalagang ulay ang giingong ungo kinsa usa sa tulo ka mga anak nga sumosunod sa halapad nga kayutaan nga kabilin sa namatay na nilang ginikanan nga kaniadto mao usab ang gidungog usab nga mga ungo sa maong dapit.

Hamugaway ang pagkabutang sa maong dalagang ulay. Mahigalaon apan subo lamang palandongon kay walay silingan niining mopaduol kay mahadlok nga matakdan sa pagkaungo.

Ang mga silingan kon pikpikon o kaha hapakon sa maong ungo isip pagtimbaya dili gayod mahimutang kon dili usab makabalos sa pagpikpik o paghapak sa pagsumpa nga dili matakdan sa pagkaungo.

Hinuon bisan kon daghan na ang mga gikatahong biktima sa pagpangungo nga ang gidudahan mao ang nahisgotang dalagang ulay wala gayod usab mahitabo nga adunay biktima sa pagpangungo nga silingan sa barangay niining gipuy-an.

Ang sagad sa mga gibiktima sa pagpangungo mao ang mga tawo nga taga laing barangay nga maoy nagpakatap usab sa mga tawo pinaagi sa pagsugilon o pagtabi sa ilang mga silingan.

Nagkadaiya ang panghitabo sa pagpangungo nga gisugilon sama pananglit sa usa ka motorista nga grabeng naangol human maaksidente dihang miangkas ang maong ungo nga nagpakaaron-ingnon lamang nga iro.

Nahunong lamang ang estorya sa pagkaungo sa maong dalagang ulay dihang kalit lamang kining nagmulo sa kasakit sa iyang tiyan ug namatay.

Gikaingon nga nagbaton kini og dakong samad sa tiyan dihang naigo sa pagpakgot sa giungo untang manananggot sa silingang barangay.

Nakigbugno ang manananggot sa maong ungo hangtod nga nailog ang gitangkil sa bilahan nga botelya nga may gisulod nga kalabera sa tawo nga gihumolan sa lana nga mao unta ang dali kaayong makaayo sa samad sa kalawasan kon ihaplas.

Sumala pa nga nasayran sa maong manananggot nagsakit ang maong ungo nga maoy hinungdan nga nagdali kini sa pagbisita sa gipuy-ang panimalay nga nagdala og bulak sa laki nga kapayas ug kini ang nakaingon nga namatay.