Tulo ka marines 'nagmaoy'

Tulo ka sakop sa Philippine Marines Corps. ang gireklamo sa manager sa usa ka bar human maguba ang pultahan sa ilang counter human sa mainiton nga panaglalis niini didto sa barangay Pajo dakbayan sa Lapu-lapu.

Ang Rising Angel Bar nga duol sa PUJ terminal maoy gisudlan sa tulo ka marino diin sila nag-inom sa wala pa mahitabo ang mainiton nga panaglalis.

Si Alicia Perez, ang manager sa maong bar mireklamo sa tulo ka marines nga sila si Staff Sgt. Calixto Montier Jr, Jesus Dimagaca ug Corporal Rudy Merculio pulos na destino dinhi sa siyudad sa Sugbo tungod sa nagsing-abot nga ASEAN Summit.

Mga sakop sa kapolisan sa Lapu-Lapu City ang miresponde sa maong insidente human ang manager sa maong bar mitawag sa ilang buhatan tungod sa pag-inisog sa mga sundalo.

Sila SPO1 Manuel Pasadoble ug PO3 Melchor Jagdon nga miresponde sa maong taho dali nga midala sa tulo ka marines didto sa presinto aron adto kini husayon ang ilang problema tali sa manager sa maong bar.

Base sa imbestigasyon, gipatiran ni Montier ang pultahan sa ilang counter sa dihang naglalis na kini sa manager tungod sa sukli nga gihatag sa usa ka waiter sa maong bar.

Human sa mainiton nga komprontasyon nahusay ra usab ang isig ka habig tungod kay gibayran niini ang danyos nga ilang nabuhat sulod sa maong bar.