P2.2 B budget sa '07 hanap pa

Pakyas ang mga sakop sa local finance committee sa siyudad sa Sugbo pagkumbinser ni Mayor Tomas Osmeña aron irekonsiderar niini ang nahaunang desisyon aron ipadayon ang giduso nga P2.2 bilyones nga proposed 2007 annual budget.

Kagahapon sa buntag nakigtagbo ngadto kang mayor Osmeña sila si City Budget Officer Nelfa Briones, City Treasurer Tessie Camarillo ug Paul Villarete aron pasabton ang mayor sa maong proposed budget.

Apan desidido na gyud ang mayor nga kalimtan nalang ang proposed annual budget og i-reenact ang P1.9 bilyones nga kasamtangang budget sa siyudad karong tuiga.

Giprangkahan ni Osmeña ang mga sakop sa local finance committee nga ipatuman na gyud niya ang skin and bone policy diin ang naandang gahin karong tuiga maoy basehan sa budgeting ug ang ubang gikinahanglanon adto nalang ikarga sa supplemental budget.

Tuyo niini sa mayor nga maklaro og walay overprice sa mga butang nga tinguhang paliton tungod kay mailhan man unya kini diha sa supplemental budget.

Sukwahi kini sa proposed budget nga gisagol ang tanan og lisud nga mailhan ang mga gi-insert nga gahin nga maoy hinungdan sa kurapsyon.