Durano gikonbikto sa pagpatay sa eyewitness

Ang kanhi polis nga si Engelberto Durano gikonbikto na usab sa hukmanan kagahapon sa buntag tungod sa pagsulay og pagpatay sa batan-on nga misaksi batok kaniya sa pagpusil ug pagpatay sa usa ka tricycle driver didto sa Busay niadtong 2001.

Si RTC Judge Eric Menchavez mipahamtang og silot ngadto ni Durano nga pagkabilanggo gikan sa duha ka tuig ngadto sa walo ka tuig tungod sa lig-on nga ebidensya nga nalambigit niya sa inguha pagpapatay ni Lloyd Carampatan, ang eyewitness batok ni Durano.

Si Carampatan maoy gigamit sa kapolisan nga lig-ong testigos batok ni Durano nga gipasakaan og kasong murder sa pagpusil ug pagpatay niini sa tricycle driver nga si Rogelio Bacalso.

Apan samtang ang 16-anyos nga si Carampatan miistar sulod sa Camp Sotero Cabahug, usa ka Roy Pineda ang nakighigala kaniya og giimbitar kini nga manuroy sila sa Ayala kaniadtong udto sa Marso 3, 2001.

Gani si Pineda pa maoy mitabang nga si Carampatan makasul-ob og kawo ug sunglasses aron nga dili siya mailhan sa nagbantay sa gate sa kampo inigdayon nila og gawas.

Apan samtang sila nanglakaw paingon sa Ayala agi sa Ayala grounds, si Carampatan gipusil ni Pineda tumong sa iyang ulo, apan sa wala pa kini pusila, si Pineda nangayo'g pasaylo ni Carampatan kay igo lang siya nga gisugo ni Durano.

Tungod sa maong pagpusil, si Carampatan deriyot mamatay.

Dihang nabalikan na sa maayong panghuna-huna si Carampatan, iyang gisaysay nga sa wala pa siya mawad-i og maayong panimuot human pusila ni Pineda, nakita niya nga ang mipusil kaniya didto midagan sa usa ka nagpaabot nga kotse ug nakita niya didto si Durano.

Nakit-an usab ni Carampatan nga ang kotse gimaneho sa usa ka Indian national nga si Taran Singh, apan ang hukmanan miingon nga walay lig-ong ebidensya nga makapakonbikto ni Singh sa kaso.

Si Menchavez miingon nga duna g'yoy basehanan nga si Durano motinguha nga patyon si Carampatan kay mao kini ang mitistigos batok kaniya pagpusil ug pagpatay ni Rogelio Bacalso.

Sa dihang gibasa ang desisyon sa kaso kagahapon sa buntag, si Durano wala na makatambong kay tua na man kini sa New Bilibid Prison human makonbikto ug pagkabilanggo sa tibuok kinabuhi sa pagpatay ni Bacalso.

Gawas sa silot nga pagkabilanggo, si Durano gimandoan pa nga bayran niini ang biktima nga si Carampatan og P200,000.