Tindero gipaulanan og bala, patay

Usa ka lalaking nagbantay sa iyang tindahan namatay human kini paulani og bala sa usa sa tulo ka mga lalaking luwan og motorsiklo diha sa Greenbelt Subdivision sa Quiot ning dakbayan niadtong milabay'ng gabii.

Ang nakabsan sa iyang kinabuhi pila ka gutlo diha sa usa ka pribadong tambalanan giilang si Marlon Sintos, 25, residente sa maong dapit ug naangol usab ang iyang kustomer nga si Julius Cano,36, taga dalan Pacaña sa Tisa ning dakbayan.

Sumala pang SPO2 Rey Cuyos sa Homicide Section sa Banat News nga kasamtangang nag-atiman ang biktima kang Cano nga dunay gipalit ug naglingkod diha sa atubangan sa iyang tindahan dihang miabot ang mga suspek.

Ang mga mamumuno luwan sa usa ka motorsiklo diin ang ulahing sakay sa luyo maoy mipusil sa biktima makadaghang higayon.

Naigo si Sintos diha sa iyang nawong, dughan, tiyan ug bitiis samtang naigo usab si Cano diha sa walang bitiis, ang duha gidala sa Chong Hua Hospital diin nakabsan si Sintos.

Matud pang Cuyos duna silay nadawat nga di kumpirmadong impormasyon nga sakop sa Alpha Kappa Rho ang biktimang si Sintos apan ang mismong amahan ug asawa niini mitug-an kanila nga wala sila masayod kung sakop sa maong fraternity ang iyang anak, sanglit wala man gani kini kaaway sa maong dapit.

Ang mga suspek daling miikyas palayo sa maong dapit. Nakakuha ang kapolisan og lima ka mga basiyo sa kalibre 45 nga bala ug usa ka deformed slug diha sa crime scene.