Hepe sa Carbon police station mitubag na sa isyu sa Ermita

Nangangkon ang hepe sa Carbon police station nga gihimo isip hepe sa maong buhatan, gihimo niya ang tanan aron sumpuon ang iligal nga operasyon sa video karera ug moli-moli lakip na drogas diha sa barangay Ermita.

Matud pang Supt. Eliseo Castronuevo,ang hagit sa pagsumpo sa video karera ug moli-moli diha sa barangay Ermita dili lang responsibilidad sa kapolisan kundili lakip na sa mga lider sa maong barangay nga apektado niini

Sa gisumitir nga explanation report niini ngadto sa buhatan sa Cebu City Police Office si Castronuevo miangkong wala siya sa estasyunan dihang gironda sa CIIB ang Ermita.

Matud pa niini padulong siya motambong sa seminar sa hazardous material (HazMat) nga himuon diha sa Police Regional Office 7 kabahin kini sa pagpangandam sa umaabot nga ASEAN Summit.

Dugang pa niini, mirason ang opisyal nga sukad sa iyang paglingkod niadtong Abril 20, 2006 hangtud Septembre 3 nakakumpiskar na sila og 19 ka mga video karera ug moli-moli diha sa sudlonong mga sitio sa Ermita.

Nakuha ang maong mga makina sa iyang mga sakop ug ang usa sa mga operasyon giubanan sa Criminal Investigation and Detection Group 7.

Giangkon ni Castronuevo nga duna gyuy mga impormasyong iyang madawat kabahin sa presensya sa mga iligal nga sugalan apan dili kini maato og dakop sa iyang mga sakop tungod sa kakulang sa mga tawo nga makahimo niini.

Matud pa niya nga kung dunay mga mahibaw-an nilang mga makina diha sa maong barangay ginagmay nga operasyon lang ang ilang mahimo dili susama sa mahimo sa CIIB nga dunay daghang mga polis nga kauban.

Dugang pa niya nga dunay mga barangay officials dili makig-coordinate ug mogiya kanila aron mabuhat ang ilang trabaho pagsumpo niini.

"The difficulty lies with the fact that even the barangay official who is most familiar with the locality cannot even coordinate, guide, and facilitate the law enforcement actions of the police…the political will to eradicate the illegal gambling is not with the law enforcement units but with the basic political unit in the community," rason pang Castronuevo.

Wala hinuon basula ni Castronuevo si Ermita barangay kapitan Felicisimo Rupinta kabahin sa insidente apan mao kini ang usa sa mga babag nga ilang nasinati aron mapatunhay ang kampanya sa kriminalidad.

Dili hinuon mosupak si Castronuevo kun desisyonan sa kadagkoan nga ibalhin siya og destino tungod sa insidente apan misaad nga kung ipabilin siya isip hepe sa maong buhatan mas mohimo pa siya og mas bug-at nga mga operasyon kontra kriminalidad.