Karneng may bird flu gikan gawas bantayan

Gipaalerto karon ang mga otoridad sa gobyerno batok ning dakong kalagmitang pagpayuhot (smuggle) sa mga karneng may bird flu virus BFV gikan sa 55 ka nasud sa kalibotan nga apektado ning sakita.

Matud pa ni Dr. Pablo Balite, Regional Qurantine Officer-sa Central Visayas nga kasagaran sa mga hayop nga gikan sa mga nasud nga apektado sa BFV barato ra kaayo ug gani ipanghatag nalang ang uban niini.

Apan matud pa ni Balite nga dili kalikayan ang kahakog sa tawo kon maoy magpatigbabaw, may kalagmitan gyung may mopayuhot niini nganhi sa nasud ilabi sa karne sa peking duck ug manok.

Sa tugpahanan maglisod ang mga smuggler tungod kay tua didto ang higpit kaayong pagmonitor sa mga tinugyanan sa Bureau of Quarantine (BOQ) aron mapakgang dayon agn delikadong sakit nga BFV.

Matud pa ni Balite nga misamot ang ilang higpit nga pagpaniid karon ning maong peligrong sakit ug gani way hunong 24 oras ang pagmonitor nga gihimo sa Regional Task Force on Avian flue Influenza nga gitukod pinaagi sa Department of Agriculture (DA) tungod sa taliabot nga Asean Summit.

Bahin sa mga delegado sa Asean summit, andam na ang tanan pagmonitor sa matag usa ning kapin sa tulo o upat ka libo nga moanhi sa Cebu karong umaabot nga Disyembre, matud pa ni Balite.

Bahin sa mga migratory birds sa Olango island ug sa South Road Properties (SRP), gipasabot ni Balite nga dili kaayo kini kabalak-an tungod kay ang BFV motapot lamang pinaagi sa "direct contact" gikan sa hayop sama sa manok ug langgam ngadto sa tawo.