Druglords, dili polis ang nanghulga

Walay polis nga nagpaluyo sa pagpanghulga ngadto sa laing polis nga nadestino sa Punta Prinsesa police station, sumala pa sa hepe niini.

Si Chief Inspector Doroteo Mantos, hepe sa Punta Prinsesa police station mitug-an sa Banat News nga walay polis nga iyang nadiskubrehan nga utok sa paghulga kang PO3 Allan Batobalonos.

"Sa akong imbestigasyon, wala man mo-exist ning maong polis, ang akong duda gikan ra ni didto sa ila (druglords), nangasuko naman ni sila kay gisegihan man nato og ronda," asoy pang Mantos.

Si Batobalonos una nang mitug-an sa Banat News nga nakadawat siya og hulga gikan sa lalaking mitawag sa telepono niadtong milabay'ng Lunes sa hapon.

Ang maong lalaki mibahad nga kutob nalang siya og usa ka bulan kung di kini mohunong pagpanakop sa mga drug personalities sa dalan A.Lopez sa barangay Labangon.

Nagduda si Batobalonos nga usa ka PO1 ang maong polis nga iyang gidudahang mao usab ang nagpaluyo sa pagbanhig kang SPO1 Francisco Balansag niadtong milabay'ng tuig.

Matud pang Mantos nga nagtuo siyang posibleng pagpanghudlat lang nga polis ang mibahad kang Batobalonos apan posibleng mga druglords lang gyud kini.

"Kay kung dili ta mag-agresibo mosamot hinuon ang ilang paghudlat-hudlat diri nato, mas maayong sigehan nato sila og ronda,"dugang pa sa opisyal.

Gimando karon ni Mantos kang Batobalonos sa pagmatngon sa iyang mga lakaw aron malikayang makakita og higayon ang mga druglords pagtumba kaniya.