Hangtud karon, halos katunga sa gidaghanon sa mga driver sa taxi ug PUJ dinhi sa dakbayan, wala magsul-ob og uniporme nga usa ka kalapasan sa kamandoan sa LTFRB nga giluwatan pipila ka tuig na ang milabay.
Si LTFRB regional director Rogelio "Jingjing" Osmeña maoy miawhag sa Citom atol sa Citom Board meeting nga pangdakpon na ang maong mga drayber sa mga public utility vehicles nga padayong mibaliwala sa LTFRB memorandum.
Ang uniporme nga gilatid alang sa mga driver sa bus ug taxi mao ang puti nga polo o T-shirt nga dunay kwelyo, samtang sa mga PUJ, asul kon blue nga polo o blue nga T-shirt nga dunay kwelyo.
Basi sa lagda, ang mga drayber nga masakpang wala motuman sa maong kamandoan, multahan og P300 sa unang pagkasikop, P500 sa ikaduhang higayon ug suspenso sa lisensya kon mohimo pa kini og laing kalapasan.
Dinhi sa dakbayan, nabantayan nga ingon sa walay kahadlok ang mga drayber sa public utility vehicles nga dili magsul-ob og uniporme sa ilang pagmaneho kay wala may gihimo batok kanila ang mga traffic enforcers.
Nabantayan pa gani nga ang ubang drayber sa PUJ nagsul-ob lang og purol ug sleeveless nga sapot sa ilang pagmaneho.