Polis gihulga sa kauban

Usa ka polis sa Punta Prinsesa police station ang gihulgang patyon ug gitagalan nalang og usa ka bulan sa gituohang polis ra usab nga gituohang protektor sa mga drug pusher diha sa dalan A.Lopez sa barangay Labangon ning dakbayan.

Si PO3 Allan Batobalonos, mitug-an sa Banat News nga niadtong Lunes sa alas 2:15 sa hapon, nakadawat siya og tawag sa telepono gikan sa usa ka lalaking mibahad nga siya patyon tungod sa perwisyong iyang nahimo diha sa dalan A.Lopez.

Giingong nangutana ang maong lalaki og "Ikaw maoy Allan Batobalonos?, tagaan lang ka namo og usa ka bulan, kung dili ka mohunong pagpangdakop sa A.Lopez, amo gyud kang kuhaon," asoy pang Batobalonos.

Nagduda si Batobalonos nga polis ang maong tawo sanglit nagtuo siyang walay druglord nga makaako ana og hulga sa mga polis gawas lang kung sulsulan gyud sa ilang mga protektor nga polis usab.

Matud pa niya nga daghan na siyang gipangdakop nga mga drug pushers sa maong lugar ug dako ang iyang pagtuo nga dunay nangatumban nga mga protektor ang iyang operasyon.

"Natumban lang siguro nato ang ilang operasyon, katong ilang mga tinabunan siguro," asoy pang Batobalonos.

Sumala pa niya nga duna na siya'y gidudahan nga usa ka Police Officer One nga aktibo pa karon sa Cebu City Police Office nga makadaghang higayon nang misuway og areglo kaniya matag duna siya'y madakpang drug pusher gikan sa maong dalan.

Nagtuo siya nga ang utok sa mibanhig kang SPO1 Francisco Balansag niadtong milabay'ng tuig diha sa dalan N.Bacalso mao gihapon ang nagplano kaniya karon.

Si Balansag gibanhigan diha sa maong dapit apan nakalingkawas bisan sa kadaghan sa igo sa shotgun diha sa iyang kilid human siya tupari og duha ka motorsiklong pulos armado diha sa maong lugar, gidudahang may kalambigitan sa operasyon kontra drogas diha sa A.Lopez maoy hinungdan niadto.

Si Supt. Melvin Gayotin ang direktor sa CCPO mitug-an sa Banat News nga angayang susihon ang reklamo ni Batobalonos ug kinahanglang mokooperar kini sa imbestigasyon sanglit dili makaayo sa imahe sa PNP ang pagpanghulga sa usa ka polis ngadto sa kaubang polis.

"That should be the best thing to do, unsaon man nato pagsulbad kung dili siya mosulti nato," asoy pang Gayotin.

Plano karong paapilon ang CIIB sa imbestigasyon samtang ang hepe sa Punta Prinsesa police station nga si Chief Inspector Doroteo Mantos mihimo na usab og pakisusi.

Kagahapon usa ka Warlito Baldesamo,32, taga A.Lopez ang nasikop ni Batobalonos atol sa buybust operation diin nakuha ang upat ka paketeng may sulod nga gidudahang shabu ug ang P200 nga marked money.

Napugos si Batobalonos og pabuto og armas dihang mikisi-kisi kini aron pagpatabang sa mga silingan. Si Baldesamo igsuon ni Vivencio Baldesamo kinsa maoy mibukbok kang PO1 Benjie Gan niadtong bulan sa Hunyo atol gihapon sa buy-bust operation.

Si Baldesamo napusilan sa grupo sa Pardo police dihang misuway kini og pusil kang Gan ug ubang mga polis.