Gubat vs. dengue gipangusgan

Opisyal sa dakbayan sa Talisay mipahugot sa iyang kampaniya batok sa dengue human ang Regional Epidemiology and Surveillance Unit 7 mipagawas og taho nga adunay 81 ka kaso sa dengue ang dakbayan sukad niadtong buwan sa Enero hangtud Septiyembre niining tuiga.

Si Konsehal Sergio "Serie" Restauro, tsirman sa panglawas mipahugot sa iyang kampaniya batok sa dengue pinaagi sa pagpahigayon og "fogging" o paaso sa mga barangay sa siyudad.

Bag-o lang ang RESU mibutyag sa maong impormasyon nga nakapaalarma sa siyudad.

Si Restauro mitataw nga niadtong buwan sa Hulyo nagsugod ang iyang grupo sa pagpahigayon og fogging sa mga barangay gamit ang mist blower.

Ug sukad sa paglusad sa Dengue-Free Task Force sa siyudad miubos na ang kaso sa dengue niini.

Gihimakak ni Restauro ang kabahin sa taho nga adunay namatay sa siyudad tungod sa dengue.

Matud sa konsehal nga ang maong taho walay kamatuoran tungod kay wala siya'y nadawat nga impormasyon kabahin niini nga tinood ang maong taho bisan gani ang buhatan sa city health sa siyudad walay nadawat nga kompirmasyon sa nahisgutang taho.

Si Restauro midungag nga ang task force mopahigayon og fogging matag semana sa mga barangay.

Ang siyudad adunay duha ka mist blower nga mao ang aerial blowing machine ug surface blower.