Gipusil tungod lang sa giawayang kural

Gipusil ang usa ka 56 anyos nga lalaki sa iyang silingan gumikan lang sa panagbangi sa kural sa balay sa miaging hapon pasado alas 3:30 sa Sitio Bayong, Yati, Liloan

Ang biktima mao si Rufino Fajardo Cabahug, minyo ug nagpuyo sa maong dapit. Samtang ang gitumbok nga mipusil mao si Alipio Kilomkilom Batayola, 63, minyo, silingan sa biktima.

Ang biktima nakaangkon og lima ka samad pinusilan sa iyang tiyan, dapi-dapi, sa tuo ug wala nga abaga ug sa dughan sa super 38 nga armas.

Usa ka saksi nga taga Tayod mitug-an sa Banat News pinaagi sa telepono nga ang biktima naglingkod atubangan sa panimalay niini dihang niabot ang armadong suspek.

Nisuway pagdagan ang biktima paingon sa sulod sa balay apan gigukod kini ug gipusil makadaghang higayon.

"Nakadungog nalang ko og buto-buto sa armas ug akong nakita si Cabahug nga nalup-og na sa tugkaran human maigo unya akong nakita ang suspek nga gibitad sa iyang asawa paingon sa ila" dugang niini.

Si SPO1 Wilfredo Caturza sa pakighinabi usab sa Banat News kagahapon miingon nga kural lang ang nakauwang sa panagsilingan sa biktima ug suspek. Suma pa ni SPO1 Caturza nga ang maong problema bahin sa boundary sa yuta naabot na sa Office of the Building Official (OBO)

Matud ni SPO1 Cartuza nga nakadawat usab sila og report nga kanunay kining magpabuto sa armas ang suspek sa panahon nga kini hubog.

Ang kapolisan nga miresponde maoy nakasikop sa suspek apan ang armas nga gigamit wala na marekober pa sa kapolisan.

Kasong frustrated murder ang giandam sa kapolisan batok sa suspek kon makuhaan na og kompletong pamahayag ang mga saksi sa kapolisan.