Duha ka babaye gikawatan

Duha ka babaye ang nabiktima sa pagpangawat sa duha ka wala mailhing lalaki niadtong Lunes sa hapon diha sa duha ka lugar sa dakbayan saTalisay.

Unang insidente nahitabo diha sulod sa usa ka dakong tindahan sa Barangay Tabunok kinsa ang biktima mao si Arlene Briones, 30-anyos, residente sa Treasure Ville, Barangay San Isidro sa maong siyudad.

Nakuha sa wala mailhing kawatan gikan ni Briones ang pitaka niini nga dunay sulod nga P6 mil nga salapi ug 6680 nga cellular phone nga gihuptan sa anak ni Briones.

Usa ka wala mailhing lalaki ang miduol ug kalit nga gisakdapan ang kamot sa bata nga naggunit sa pitaka dayong dagan sa gawas.

Sa laing bahin, nagkurog nga mitaho sa kapolisan sa Talisay ang usa ka collector sa lending human siya tulisa sa wala mailhing tulisan diha sa Riverside, Barangay Dumlog.

Nadala sa kawatan gikan ni Jocelyn Parao, 24, taga Barangay Tisa Labangon niining dakbayan, collector sa Caparies Credit Collection ang P5 mil nga salapi nga iyang nakolekta, pass book ug listahan sa ngalan sa ilang mga kliyente.

Base sa imbestigsyon ni PO1 Engie Piloto polis sa Talisay nga nangolekta og bayad si Parao gikan sa ilang mga kliyente dihang giduol, gitiuna'g armas ug mideklarar og hold-ap ang suspek.

Tungod sa kahadlok gitunol ni Parao ngadto sa tulisan ang iyang bag apan ang suspetsado mipasalba sa iyang pusil una kini mibiya paingon sa sapa sa Mananga.

Ang kapolisan sa Talisay mipahigayon og follow-up sa maong insidente.