Hepe sa Carbon paesplikahon tungod sa VK

Gimandoan ang hepe sa Carbon police station sa pag-esplikar kabahin sa naghitak nga mga makina sa video karera ug moli-moli nga nasakmit atol sa kinalit nga ronda diha sa barangay Ermita ning dakbayan niadtong Lunes sa kaadlawon.

Sumala pang Supt. Pablo Labra sa Criminal Investigation and Intelligence Branch duna nay direktiba si Cebu City Police Office acting director Melvin Gayotin ngadto kang Supt. Eliseo Castronuevo.

Ang direktor sa CCPO mitug-an sa Banat News nga buot niyang mahibaw-an gikan mismo kang Castronuevo kung unsay iyang mga gihimong lakang batok sa iligal nga sugal.

Giangkon ni Gayotin nga dunay posibilidad nga may nalambigit nga mga polis o ba kaha mga opisyales sa barangay nga 'protektor' sa maong iligal nga sugal.

Matud pa niya dili basta masulbad ang maong kahiwian kung dili mokooperar ang publiko sa pagsumbong kung si kinsang mga personalidad ang nagpaluyo sa operasyon sa maong iligal nga sugal.

Si Mayor Tomas Osmeña mipadayag human sa pagkasakmit sa 35 ka mga makina sa maong iligal nga sugal diha sa maong barangay mipadayag sa iyang pagdudang dunay nagpaluyong mga opisyales sa operasyon.

Niadtong milabay'ng Lunes gawas sa 35 ka makina sa video karera ug moli-moli nakadakop usab og onse ka mga sugarol sa maong mga makina ang kapolisan, tulo kanila mga minor de edad.

Samtang nakasakmit usab og mga binultong drogas ug armas ang kapolisan diha sa mga panimalay sa mga gidudahang drug pushers.

Buot ni Gayotin nga sugod sa paglingkod ni Castronuevo isip hepe sa Carbon police station nga matino kung pila na ka mga video karera ang nasakmit sa ialng grupo ug kung unsa ang ilang mga gihimong ubang lakang.

Giangkon ni Gayotin ug Labra nga ang mga gambling operators migamit og taktika sa mga gerilya diin pagtago-tago ug kanunay'ng magbalhin-balhin og pwesto maong lisod kaayong tultulon.

Gawas pa niana, gagmay na ang kahon ug di na kaayong bug-at ang mga makina karon sanglit mahimo na kining maaswat sa usa lang ka tawo panahon nga dunay mga ronda.