Usa sa tulo ka tulisan maoy mipuli og maneho sa taksi paingon sa habagatang bahin sa lalawigan.
Apan walay suwerte ang duha sa tulo ka tulisan kay nadakpan sa dihang ang kapolisan sa Compostela mihimo og checkpoint pasado alas 4:30 sa kaadlawon sa may National Highway sa Poblacion.
Ang nadakpan mao sila si Vicente Soco Martel, 26, nagpuyo sa Tuburan Sur Danao, ug Wirdel Banson Tecson, 24, residente sa dalan Lapu-Lapu, Poblacion Danao, ang duha pulos mga ulitawo. Ang usa nga nakaikyas wala mailhi sa kapolisan.
Ang taxi driver giilang si Alfredo Medallo, 54, minyo, taga Tingob Mandaue City ug nagmaneho sa Asia Ride nga may plakang GWY 692.
Nangulo sa checkpoint mao si SPO3 Quirino Vasquez.
Si SPO2 Pedro Enriquez mitug-an sa Banat News nga ang tulo ka tulisan misakay ni Medallo sa Highway Seno sa Mandaue ug nimando nga magpahatod dinhi sa dakbayan.
Sa dihang duol na sila sa Queen City Garden, usa sa tulo ka tulisan mibunot sa kutsilyo dayong tion ni Medallo ug mideklarar kini og tulis.
Nakuha gikan ni Medallo ang P1,600 nga kinitaan tibuok adlaw.
Human mahatag ang kuwarta, si Tecson nimando nga pabalhinon og lingkod si Medallo sa pikas lingkoranan sa front seat.
Sumala pa ni SPO2 Enriquez nga samtang nagpadagan si Tecson paingon sa amihanang bahin, si Martel ug ang usa ka kauban maoy nagtion og kutsilyo ni Medallo.
Matud ni Enriquez sa dihang gipara sa mga polis nga nag-checkpoint ang taxi daling nakasinggit si Medallo nga siya gitulis.
Ang tulo misuway unta sa pag-ikyas apan nasikop silang Martel ug Tecson samtang ang usa nakaikyas. Si Martel ug Tecson nagdumili sa pagtug-an sa ngalan sa ilang kauban sa pagpanulis.
Nakuha sa kapolisan ang kutsilyo nga maoy gigamit pagtion nila ngadto sa biktima.
Ang duha kasamtangang gibalhog sa detention cell sa Compostela samtang gihikay pa sa kapolisan ang kasong roberry nga ipasaka batok kanila.