35 video karera, molimoli nasakmit sa Ermita

Gironda sa gibanabanang kapin usa ka gatus ka polis sa Cebu City Police Office ang sudlonong bahin sa barangay Ermita nga miresulta sa pagkasakmit sa 35 ka mga video karera ug moli-moli ug pagkasikop usab sa onse ka mga tawo.

Ang operasyon gipanguluhan sa Criminal Investigation and Intelligence Branch dinuyugan sa mga sakop sa Special Weapons And Tactics, Crime Suppression Unit, Vice Control Section, RMG, BIN, MPG ug mga sakop sa Field Training Program.

Ang ronda pinasikad sa saturation drive batok sa iligal nga mga sugal ug ubang matang sa kriminalidad lakip na ang pagserbi og search warrant sa duha ka magsuong mga gidudahang drug pusher ug usa ka balay nga gidungog nga dangpanan sa mga tulisan gikan sa Ozamiz.

Atol sa pagpangronda, nakuha ang katorse ka video karera ug katorse usab ka moli-moli gikan sa nagkalain-laing mga balay apan walay nangadakpang nagduwa, apan sa unom ka moli-moli nga nakuha gikan sa ubang balay, siyam ka mga tawo ang nadakpan tulo kanila mga batang nag-edad og 15 ug 16 anyos.

Ang mga nadakpang hamtong giilang sila si Cresencio Catalan, Ronald de Egurrola, Luisito Lucido, Renante Alegarbes, Rolando Dy ug Sulpicio Unabia. Nabawi gikan kanila ang P480 nga mga sinsilyo ug ang unom ka moli-moli machines.

Sa linaing ronda batok iligal nga drogas, nadakpan ang usa ka Romeo Mansueto diha sa Ermita Beach sa nahisgutang barangay pinasikad sa search warrant nga giluwatan ni RTC Branch 9 Judge Geraldine Faith Econg.

Nakuha gikan kaniya ang usa ka dakong bulto, usa ka medium size ug usa ka gamayng paketeng pulos may sulod nga gidudahang shabu. Ang igsuon ni Romeo nga si Rubin kinsa apil sa subject sa search warrant daling nakaikyas atol sa pagronda.

Samtang laing gironda mao ang panimalay ni Pacita Tude alyas Bebot, kinsa gitumbok nga notadong bigtime drug pusher sa Ermita. Si Tude maoy inahan sa SK chairman nga si Carlo Magno Tude kinsa nadakpan duha ka semana ang nakalabay atol sa buy-bust operation sa CIIB.

Nakuha diha sa balay ni Tude ang usa ka dakong plastik, upat ka medium size packs nga pulos dunay sulod nga gidudahang shabu, mga drug paraphernalia ug mga syringe. Wala madakpi si Pacita Tude atol sa maong raid.

Nasikop usab ang gitumbok nga local contact sa grupo sa mga tulisan gikan sa Ozamis city nga si Jerry Rosal alyas Kulot human kini makuhai og usa ka kalibre .38 rebolber nga may tulo ka buhing bala.

Matud pang CIIB Chief Paul Labra sa pakighinabi sa mga tigbalita, si Rosal kanhi kauban sa namatay nga si Joel Nodalo alyas Tungol ug mao karoy ilang gidudahang gidangpan sa gidungog nga pag-abot sa grupo ni Jun Halap kinsa maoy lider karon sa mga tulisang gikan sa Mindanao nga miabot dinhi sa Sugbo.

"Because we received consistent reports that a group from Ozamis City arrived in Ermita and took shelter in his house," matud pang Labra.

Sa impormasyong nadawat sa CIIB, si Rosal dunay gitaguang M16 armalite rifle ug duha ka 9 mm pistol, apan human siya madakpi gibutyag ni Rosal nga nabaligya na niya ang M16 ug ang duha ka 9 mm pistol nasunog.