Imbestigador sa BOC moabot karong adlawa

Tulo ka imbestigador sa BOC Manila ang moabot karong adlawa alang sa pagimbestigar sa anomalosong pagkawat sa upat ka mga luhong sakyanan sa milabayng semana diha sa CIP.

Kini ang nasayran sa Banat News sa pakighinabi kang Cebu Customs District Collector Recardo 'Boysie" Belmonte.

Ang maong mga imbestigador naglangkob sa mga abogado gikan sa Internal Investigation and Prosecution Division (IIPD), Investigation and Prosecution Division (IPD) ug Iinvestigation and Enforcement Group (IEG).

Si Customs Commisioner Napoleon "Boy" Morales mipadala kang Atty. Nemesio Magno Jr. sa IPD, Atty. Jun Puno sa IIPD ug Atty. Jun Umacub sa IEG nga maoy maglangkob sa pagahimoong imbestigasyon.

Human nga gisumiter sa IEG Cebu ang ilang pasiunang imbestigasyon ngadto sa ilang ulohang buhatan ug kang Comm. Morales nasuta nga adunay mga opisyales ug kawani sa BOC Cebu ang kinahanglan manubag sa anomalosong pagrelease sa upat ka mga luhong sakyanan sa milabayng Petsa 11 ning bulana diha sa CIP.

Base sa nasayran sa Banat News pipila ka mga departamento ang gikatahong imbestigahon sa maong investigation pannel gikan sa BOC sa kaulohan sama sa Wharfinger sa Customs, OPASCOR, Collectors Office, Assesment Div., Legal Div. Broker ug uban pang giagian sa maong papeles sa pagproceso niini sa wala pa kini makagawas sa CIP.

Usa sa bug-at nga testimoniya unya sa maong imbestigasyon mao ang pagluwat ug affidavit ni Jose "Joe" Urindina nga maoy nakapalit sa upat ka mga luhong sakyanan nga Right Hand Drive kun RHD.

Sa maong affidavit ni Urindina gihinganlan ang lima ka mga opisyal ug kawani nga iyang gihatagan ug kwarta aron lamang kini makalusot diin migasto kini ug sobra sa 800 mil ka pesos.

Matud pa ni Belmonte nga ang maong imbestigasyon iyang giduso ngadto sa ilang ulohang buhatan aron malikayan ang mga biases diin lakip ang iyang buhatan ang angayang manubag usab niini.

Kahinumduman nga upat ka mga luhong sakyanan nga RHD naglangkob sa duha ka nissan terrano, usa ka Mitsubishi Pajero ug usa ka Toyota Delica ang gipalusot kini sa CIP sa milabayng Oct. 11 human ang mga dokumentos niini gipeke sa mga taong responsable sa maong pagpalusot.

Ang upat didto makompiskar pagbalik sa dakbayan sa Lapu-lapu sa dihang buot na unta kining ipausab ang manubela niini ngadto na sa left hand drive ug ang usa niini didto masikop sa Brgy. Agus human nga usa ka driver ang nasakpan nga buot unta nga mobiya sa maong sakyanan sa usa ka bakante nga wearehouse samong dapit.

Ang maong mga sakyanan nahukman na nga pabor sa goberno ug lakip unta sa pagahimoong subasta human kini makumpiskar niadtong bulan sa Marso ning tuiga ug nakaso sa panahon ni kanhi Customs Collector Ma. Lourdes Mangaoang sa dihang misdeclared ang mga dokumento niini ug pagadad-on unta kini ngadto sa probinsiya sa Siquijor.

Ang upat ka mga luhong sakyanan nahibalik na sa poder sa Customs District Office sa Sugbu ug karong adlawa possibleng himoon na ang imbestigasyon sa mga responsableng nalambiggit niini.