Tulo ka atleta dakop human mikulata'g, nanio'g armas sa drayber

Tulo ka atleta sa triathlon ang gidakop sa kapolisan sa Pardo human gipasanginlang nangulata ug nanion og armas ngadto sa usa ka drayber sa minibus nga pasaheroan niadtong milabay'ng Miyerkules sa hapon diha sa dalan N.Bacalso sa Bulacao ning dakbayan.

Ang tulo giilang sila si Daxkino Sarabosing,28, taga Sunnyhills Subdivision sa Talamban, Eldy Banluta,27, taga Veterans Drive sa Nivel Hills sa Lahug ug Warrentroy Vergara,33, taga Tuyan, Naga.

Ang tulo nadakpan sa grupo nila ni Senior Inspector Aureo Sanchez ang hepe sa Pardo Police Station, Inspector Armando Cañete ug PO2 Elvis Cuerbo sa Service Security Group.

Sa imbestigasyon sa Pardo police station luwan sa usa ka pribadong pick-up ang mga suspek ug gikatahong kalit nga gibabagan ang minibus nga gimaneho sa biktimang si Ricardo Cabantoy,40, taga Magsico, San Fernando.

Gikatahong si Sarabosing armado og usa ka 9mm nga CZ75 pistol mition sa biktima samtang si Banluta armado og petsakorno mikulata sa drayber nga nakaingon sa pagkagisi sa baba niini ug pagkabun-og sa kalawasan.

Samtang si Vergara gikatahong maoy midunggab og icepick diha sa unahang ligid sa minibus sa biktima.

Ang tulo naatlan sa mga polis sa ilang pagdagmal sa biktima dihang dunay mga residente ang daling mitug-an sa kapolisan.

Nakuha gikan kang Sarabosing ang armas niining lisenyado nga may duha ka magazine ug 27 ka buhing bala, apan walay napakita si Sarabosing og permisong mahimo niyang dad-on gawas sa ilang panimalay ang armas.

Ang biktima daling gidala sa tambalanan tungod sa nahiagumang mga bun-og sa kalawasan.

Nasuta nga si Banluta kanhi sakop sa national triathlon team sa nasud samtang ang laing duha magduduwa usab sa maong paugnat sa kusog.

Matud pa sa mga suspek atol sa pakighinabi sa Balitang Bisdak nga sayo pa nianang adlawa diriyot silang maigo sa pagpakusog og padagan sa biktima sa iyang bus diha sa may Pitalo sa lungsod sa San Fernando samtang sila nagpraktis og bisekleta.