Unang silot nga gipahamtang ni Ingles ngadto ni Eugene Owatan, taga barangay Pit-os Talamban niining dakbayan mao ang "life imprisonment" o pagkabilanggo sa tibuok niining kinabuhi ug pabayaron usab ang akusado og P400 mil nga multa tungod sa paghupot niini og tulo ka gagmay'ng paketeng shabu, usa ka medium nga paketeng shabu ug duha ka plastic packs nga dunay mga lama sa shabu.
Ikaduhang silot batok ni Owatan mao ang pagkabilanggo sulod sa walo ka buwan ngadto sa duha ka tuig ug pabayaron usab kini og P25 mil nga multa tungod sa paghupot niini og shabu paraphernalia.
Niadtong Agosto 2004, si Owatan nasikop sa gipahigayong pagpangronda sa kapolisan sa Cebu City Police Office (CCPO).
Ang maong pagpangronda gipangulohan ni Police Superintendent Paul Labra, hepe sa Criminal Intelligence and Investigation Branch (CIIB).
Dala sa mga polis nga nagronda ang search warrant batok ni Owatan nga giluwatan ni RTC Judge Simeon Dumdum sa branch 7.
Si Owatan mihimakak sa mga pasangil batok kaniya ug wala usab niini angkona ang mga ebidensiyang nasakmit sa mga polis.
Matud pa ni Owatan nga ang mga polis misulod sa ilang balay ug gimanduan siya niini nga ibutang ang iyang duha ka kamot sa tangkogo, siya ug ang iyang igsoon nga si Christine gipagawas ug gipalingkod diha sa ilang sala.
Ang nahisgutang mga polis nangukay diha sa iyang kwarto diin ang mga ebidensiya nakit-an ug ang mga tanod nga maoy saksi sa pagpangronda mitungha 30 minutos human na sa ronda.
Apan ang igsoon ni Owatan nga si Christine miluwat og certificate nga nagkanayon nga siya maoy mipirma sa search warrant nga gi-serve sa mga polis batok sa iyang igsoon ug saksi siya sa tanang gibuhat sa mga polis kinsa mipahigayon sa ronda.
Apan si Christine milakip sa pagpasangil nga ang nahisgutang mga ebidensiya planted apan wala kini hatagi og gibug-aton ni Ingles hinungdan nga ang akusado gihukman sa nahisgutang silot.