Gipusil sa Akrho

Patay ang usa ka 18 anyos nga lalaki human gipusil sa gituohang mga sakop sa Alpha Kappa Rho alas 12 pasado ang takna sa kaadlawon sa Tribunal, Centro, Mandaue.

Ang namatay mao si Clint Anthony Catarig, ulitawo ug lumad nga lumolupyo sa maong dapit.

Nailhan sa mga nakasaksi sa pagpamusil ang usa sa tulo ka mga suspetsado nga mao si Roberto Flores alyas Obet, hingkod ang panuigon, ulitawo nga taga sitio Oploc, Looc, Mandaue.

Si Chief Inspector Abraham Ocampo, hepe sa presinto 1 sa Centro Police Station nga gikahinabi sa Banat News miingon nga mopalit unta og sigarilyo sa usa ka tindahan ang biktima.

Matud pa ni Ocampo nga nasugatan sa biktima si Flores ug mga kauban ug walay pangutana kalit lamang niining gipusil.

Naigo sa bukton ug dughan ang biktima ug daling gidala sa Mandaue District Hospital apan gibalhin sa Chong Hua Hospital sa dakbayan sa Sugbo ug didto namatay.

Dugang pa ni Ocampo ang usa sa mga ig-agaw nga lalaki sa biktima maoy ilang nakompirmar nga sakop sa Tau Gamma Phi.

Nagtuo si Ocampo nga nasaypan lang sa mga suspetsado ang biktima kinsa mibawos sa nahitabong pagpamusil sa miaging gabii nga ang mga suspetsado mao usab ang mga sakop sa Tau Gamma Phi.

Si Ocampo miingon nga atol sa maong pagpamusil ang nagtapok nga mga sakop ang dali usab nga nakahapa maoy walay usa kanilang naigo.