Base sa taho nga ang maong vintage bomb naanod sa dagat diha sa lugar ug napalgan kini sa mga bata ug gitiltil tungod kay ipatimbang unta kini apan usa ka molupyo sa lugar ang mibadlong sa maong mga bata ug gitugyan diha sa kapolisan sa Talisay ang nahisgutang bomba.
Sila si PO1 Roy Sarsaba ug PO1 Gepta Jumawan kinsa nadestino diha sa Barangay Tanke ang midala sa vintage bomb diha sa police station sa Poblacion.
Ang kapolisan sa Talisay dali usab nga nangayo og ayuda sa bomb disposal sa Cebu Police Provincial Office (CPPO) para makuha ang nahisgutang bomba tungod kay posible kining mobuto ilabi na nga gitiltil na kini sa mga bata.
Kagahapon ang Banat News napakyas og kuha og dugang pamahayag kabahin sa maong insidente tungod kay si Maximino Lañas, kalihim sa barangay namalibad nga wala silay kalibutan sa maong insidente tungod kay wala kini mataho diha sa barangay hall.