Mao kini pagtuo ni City Treasurer Tessie Camarillo hinungdan nga gipasalig niini nga iyang pangunayan ang pagsusi sa maong binuang nga giangkon niyang dugay nang nahitabo sa iyang departamento apan karon lang bag-o na diskubrihe.
Sa inisyal nga pakisusi ni Camarillo human nabulgar ang maong anomaliya niadtong miaging adlaw nasuta niini ang duha ka kaswal nga kawani sa City Treasurers Office nga sila si Gwendolyn Pacaña ug Melafe Tayuna maoy responsable sa pag-tamper sa mga sedula.
Sa pagpakighinabi sa mga tigbalita kang Camarillo kagahapon sa buntag gipresentar niini ang mga gipang-tamper nga presyo diha sa sedula nga gilukat sa upat ka kompaniya nga Axcess Pharma, Dayang Xiyi Philippines Incorporated, Best Choice Home Real Development Corporation ug ang PC Wise Corporation diin ang tag P500 niining nabayran sa sedula gihimo na lang kining tag P38.94 sa ikaduha ug ikatulo nga kopya sa resibo.
Sukad kagahapon wala na gyud mo-duty pa ang maong mga kawani nga nasakpang mi-tamper sa presyo sa sedula.
Apan matud ni Camarillo ang National Bureau of Investigation (NBI-7) maoy gitahasan ni Mayor Tomas Osmeña nga mo-imbestigar sa maong anomaliya ug ingon man usab gipadalhan na nila og kopya sa mga ebidensya nga nahipos ang City Attorney's Office.
Si Osmeña una nang mimando nga taktakon ang maong mga kawani nga kaswal nga nalambigit sa maong anomaliya.