Si Bise Mayor Michael Rama mitakda sa pagpatawag kang Supt. Melvin Gayotin, hepe sa Cebu City Police Office (CCPO) karong petsa 27 niining bulana atol sa ilang sesyon matag Miyerkules.
Si Rama napugos pagduso niini atol sa milabay'ng sesyon sa konseho niadtong miaging hapon human nagtinguha unta nga i-withdraw ni Konsehal Procopio "Coping" Fernandez ang iyang resolusyon nga nag-awhag sa kapolisan pagpalig-on sa kampanya niini batok sa mga nahitabong tulis ug mga snatching dinhi sa dakbayan niining nangaging mga adlaw.
Gisukip sa gipasar nga resolusyon ni Fernandez ang pag-awhag kang Gayotin nga mopakatap og daghang mga polis sa kadalanan ilabi na sa mga lugar nga gitumbok nga crime prone areas ug ingon man ang paglusad og manhunt operation batok sa mga kriminal nga responsable sa maong mga mitumaw nga krimen.
Gusto ni Rama nga makahatag og tukmang kasayuran si Gayotin sa mga sakop sa konseho kabahin sa gihimo karon sa kapolisan pagpatunhay sa kahusay ug kalinaw ug ingon man ang pamaagi niining gisagop aron masulbad ang mga nahitabong kriminalidad.