Pastor nakuhaa'g shabu

Nangangkong pastor sa usa ka born again nga grupo nadakpan atol sa usa ka buy bust operation sa Vice Control Section diha sa may North Reclamation Area (NRA) sa Carreta ning dakbayan niadtong milabay'ng gabii.

Ang nadakpan mao si Eleazar "Ellie" Tabar,48, taga Back Shrine, Buhisan ning dakbayan, human mitunol og usa ka medium size nga paketeng gidudahang shabu ngadto sa grupo ni PO3 Jaime Otadoy.

Matud pang Chief Inspector George Ylanan ang suspek kinsa gidudahang level-two drug pusher, luwan sa usa ka kolor orange nga multicab ug nakigsabot sa grupo nila ni Otadoy kabahin sa palitong tunga sa bultong shabu sa kantidad nga P8,000.

Gikatahong ang binayranay adto buhaton sa parking lot sa usa ka dakong mall sa NRA apan dangtan pila ka gutlo giingong mipahibalo kanila si Tabar nga anha nalang niini ihapit sa usa ka karaang mall nga nasunog diha sa NRA sa barangay Carreta.

Human sa transaksyon daling gidakop si Tabar sa kapolisan ug nakuha gikan kaniya ang duha ka gatos nga buy-bust money ug ang mga pinutol nga papel nga gipalup-itan sa maong kwarta.

Matud pang Ylanan, base sa impormasyong ilang nasagap, si Ellie maoy nipuli sa negosyo sa drogas sa maguwang niining si Bebot Tabar kinsa nagtingkagol karon sa Bagong Buhay Rehabilitation Center.

Kusganon hinuon kining gipanghimakak ni Ellie atol sa pakighinabi sa Banat News, matud pa niya sukad nga nakagawas siya sa Provincial Jail niadtong 1987 nagbag-o na siya ug nahimong pastor.

Si Ellie miangkong miyembro sa gikahadlukang Alega Gang niadtong dekada 80 nga bantog kaayo sa "agaw-armas" ug pagpanulis dinhi sa Sugbo apan nabungkag ang grupo ug nabilanggo si Tabar niadtong 1984.

Matud pa ni Tabar nga niadtong 1998 gibutang-butangan na usab siya og kalambigitan sa drogas nga hangtud karon iya pang giatubang ang husay sa korte.

Kalabot sa iyang pagkasikop niadtong Miyerkules sa gabii, mipasangil siyang igo lang siyang giimbitar sa mga sakop sa VCS diha sa CCPO apan nahibulong nalang dihang pag-abot sa buhatan giaresto siya ug gipahibalong nadakpan siya sa buy-bust og drogas.

"Estorya ra na nila, ila na nang alegasyon, wala man ko'y gihimong supak sa balaod," rason pang Tabar.